Nevita Mezas - potrèt: Dulce Koopman

Nevita Mezas – potrèt: Dulce Koopman

WILLEMSTAD – Kòrsou ta sera konosi ku un fenomeno nobo: ‘Co-Working Space’, introdusí pa Startup Curaçao, un plataforma ku ta yuda empresarionan riba nan kaminda pa bira eksitoso. Den praktika Startup Curaçao ta un komunidat di empresario ku ta topa otro pa logra metanan komun ku ta benifisia sektor empresarial lokal.

E fenomeno di ‘Co-Working Space’ mester resulta den mas stimulashon i eksito di empresarionan nobo na Kòrsou. Den eksterior komparti espasio di trabou ta konosi I popular.Na Kòrsou den lokalidatnan kompletamente restoura, ekipá i espasioso di Stadsherstel na Skalo, e empresarionan por komparti nan ambishonnan.

Nevita Mezas di Startup Curaçao ta splika dikon Kòrsou ta benfisiá ku e proyekto aki

Startup Curaçao su meta ta pa konektá empresarionan kaminda ku falta konekshon. Nevita Mezas ta splika ku ta difisil pa haňa informashon na Kòrsou. Ta pesei e plataforma ta boga pa trese tur e partidonan huntu. Den praktika kualke problema ku e empresarionan tin, nan por aserka Startup Curaçao.

Co-Working Space

Co-Working Space – potrèt: Dulce Koopman

E kuater puntonan ku Startup Curaçao ta konsentra riba dje ta: ‘Co-Working Space, Plataforma pa Siňa, Plataforma pa Inverti i Plataforma pa Evento. Startup Curaçao ta konvensi ku ta dor di sostene otro, kolaborá i konstrui huntu, empresarionan por logra nan meta. Aktualmente tin mas o menos 15 empresa nobo ku ta partisipa den Startup Curaçao.

Dia 24 di april awor Startup Curaçao ta organisa na Skalo, un kombinashon di un evenementu di netwerk ku algun oradó ku apertura di un ‘Co-Working Space’. Algun instansia ku ta stimula sektor empresarial ta presente pa duna informashon. Ta trata di entre otro Kamara di Komersio, Korpodeko, JCI, MEO, CX Pay i CITI.

Outor Dulce Koopman