ORANJESTAD – Na mei òf yüni lo bira kla si ta posibel pa instalá un servisio di fast ferry entre Aruba, Kòrsou i Boneiru pa loke ta legislashon. E tres islanan awor a duna òrdu pa tene kòmbersashonnan ku stakeholdernan lokal.
E ofisina hulandes di investigashon Icasus aktualmente ta papia entre otro ku servisionan di duana i di imigrashon di e islanan ABC i Koninklijke Marechausse. “Meta di e rapòrt no ta pa konsehá si mester instalá un servisio di ferry òf laga, sino pa inventarisá kiko eksaktamente ta nesesario den e área di regulashon i maneho pa hasi un servisio di ferry posibel”, Zairo Ruiz, manager di proyekto na e fondo di proyekto Fondo Desaroyo Aruba. (FDA)
FDA ta paga e investigashon aki na nòmber di e tres paisnan. Segun Ruiz ta e intenshon ku den e simannan binidero e servisionan di imigrashon i duananan di tur tres e islanan yega na un liña pa loke ta e kondishonnan impresindibel. Un rapòrt preliminario e ora ei ta bai pa e paisnan ku ta duna e òrdu, i esakinan ta duna nan komentario riba dje pa por traha un rapòrt final. “For di e punto ei e paisnan mester disidí si nan ke sigui mas aleu, anto kon”, Ruiz ta bisa.
Islariba
Segun e miembro di Staten di PPR Andin Bikker, un di e pioneronan di e plan aki, e yegada di un servisio di fast ferry entre e islanan ABC a yega un paso mas serka ya ku awor Islariba tambe a haña interes pa instalá un servisio entre e islanan ei. Durante e último Deliberashon Interparlamentario di Reino na Sint Maarten atrobe a enfatisá e deseo pa un servisio fast ferry. Ei tambe a duna e òrdu pa hasi un estudio di alkansabilidat.
Outor Ariën Rasmijn