E tumadónan di e inisiativa pa un marcha di silensio Mimoun Himmet i Marieke Knol ta kana dilanti – potrèt Janita Monna
KRALENDIJK – Mas o ménos kuatershen hende djárason anochi a kana den un marcha di silensio pa Ferry Bakx. E polis a fayesé 17 di ougùstùs ora ku a tir’é durante di un persekushon.
“Mi no tabata konos’é masha bon”, un señora ta konta. E ta para warda na stadion di Kralendijk kaminda un djis e marcha di silensio ta sali. “Pero djis algun dia promé ku el a muri mi a papia kuné basta ekstensivo. Tokante su trabou.”
Ta e trabou ei tabata fatal p’e: awe eksaktamente un siman pasá el a fayesé. E plan pa un marcha di silensio a lanta djárason meinta. “Nos a haña ku algu mester sosodé, Mimoun Himmet, amigu di Bakx i un di e organisadónan di e marcha ta bisa. Ko-organisadó Marijke Knol: “Nos a regla tur kos den un ora. Tur hende a koperá. E asistensia tabata enorme.
Pa banda di 9 or e grupo ta kuminsá move. Amigu, kolega, hulandes, bonerianu, koredó di motersaikel, mucha. Hopi di nan tin un bela den man.
Silensio
Ta ketu. Kant’i kaminda hopi hende ta duna nan rèspèt. Hende den restorant ta pone nan kuchu ku fòrki abou un ratu. E desfile ta yena Kaya Grandi kasi di punta pa punta. Niun hende no ta papia. Ta laman so ta ronse den fondo.
Mas o ménos un ora despues e marcha ta yega warda di polis. Ta pone flor i bela serka e lugá pa konmemorá Bakx. Hefe di kuerpo suplente Jose Rosales i hefe di kuerpo suplente Simone Steendijk ta risibí e kondolensianan. Despues ta ketu pa dos minüt mas. Un silensio ku ta kibra ku un aplouso grandi.
Periodista Bubui Cicilia a kana den e marcha. “E kos aki ta toka henter pueblo. Ora mi a tende e notisia mi a pensa ‘No por ta, no por ta.’ Mi a shòk di bèrdè mes.”
Inimaginabel
Representante di Reino Gilbert Isabella tambe ker a duna su kondolensia personalmente. “Mi ta haña inimaginabel kiko a pasa, Mi konos’é espesialmente pasobra komo polis e tabata kompaña delegashonnan. Pero poko tempu pasá mi mester a pasa buska algu serka dje. E ora ei nos a para papia un ratu. Ta bunita ku awe nochi tin asina tantu hende presente.”
Esei hefe di kuerpo suplente Rosales tambe ta haña. “E impakto riba e kuerpo di e loke ku a sosodé siman pasá ta masha grandi mes”, e ta bisa. No ta algu ku bo por lubidá asin’asina. Mi tin masha rèspèt pa e koleganan ku ta bin traha.”
Potrèt: Janita Monna
Malechor
Un polis den un T-shirt spesial, un homenahe na Bakx, ta seka un lagrima ora puntr’é si e ta logra traha ainda. “Si i nò”, e ta bisa. “Nò pasobra e ta hasi doló i si, pasobra mi ke pa kue e malechornan”
Rosales tambe ta te ora kue e malechor e por sosegá. E ta satisfecho kon e investigashon ta kore awor. Pero e ta hasi un apelashon urgente tambe na un i tur ku sa algu di e kaso. “Yuda nos. Konta nos, maske ta anónimamente.”
E kremashon di Ferry Bakx ta djasabra atardi na Hulanda. Por sigui e kremashon na Boneiru via live stream.
Outor Janita Monna