Segun meteorólogo Yogi Coffie, Matthew lo kousa espesialmente hopi molèster di awa – potrèt- Meteo Kòrsou.
WILLEMSTAD – A posponé elekshonnan di mayan na Kòrsou te djárason 5 di òktober. Esei kabes di sentro elektoral Raymond Pacheco Römer i promé minister Ben Whiteman a bisa awe durante un rueda di prensa. Despues di deliberashon ku e lidernan di partido a disidí di posponé e elekshonnan pa motibu di molèster di orkan Matthew ku awe i mayan ta pasa pegá ku Kòrsou.
Awe Matthew a desaroyá bira un orkan. Segun Yogi Coffi di Servisio Mereorológiko awe nochi banda di 20.00 ora e ta pasa Kòrsou na un distansha di algu mas ku 200 kilometer. Gobièrnu di Kòrsou ta alertá pa inundashon.
Awe na Kòrsou áwaseru a kuminsá kai kaba i tabatin mal tempu i awe meinta e efektonan a bira visibel rápidamente. Zeelandia, Jongbloed i Saliña a kambia den fluho di awa. Ministerio di Tráfiko, Transpòrt i Planifikashon Espasial ta apelá na tur hende pa mèldu si tin roi fèrstòp via +5999 6693674 i na e lugánan konosí tene kuenta ku inundashon, pasobra ‘t’asina ku tin lugá ta yena ku awa’.
Tambe nan ta pidi tur hende pa no kita mata ku yerba, pasobra esakinan ta para e fluho di awa. Kompania di Aviashon InselAir a kanselá tur buelo pa mayan, pasobra nan tin 26 destinashon den Área Karibense. “E chèns ta grandi ku na por lo ménos un di e destinashonnan lo eksperensha molèster.”
Hòspital
E poliklínika di SEHOS a sera 12 or pa motibu di e tempestat. Esei un trahadó na e sentral di telefon a konfirmá. Via un komunikado di prensa ta pidi pa limitá bishita na hòspital òf tene esaki kòrtiku. Via e numbernan regular nan ta aksesibel, pero si e ret kai afó, kasonan di urgensia por tuma kontakto via e numbernan selular +5999 5604900 òf +5999 5614900. Ámtenarnan ta liber mayan i ta apelá na e sektor privá pa nan tambe duna nan trahadónan liber mayan. Skolnan na Aruba, Boneiru i Kòrsou ta será mayan.
Preparashon
Ministerio di Asuntunan Interior i Relashonnan den Reino na Hulanda tambe tin kontakto estrecho ku e islanan. “Tin liña kòrtiku ku e representantenan”, Thijs Manten di e ministerio ta bisa. “Si tin nesesidat Hulanda por manda sosten. Esei ta bai via Ministerio di Defensa, Base di Marina na Aruba i Kòrsou i wardakosta.” Pa loke ta Boneiru e situashon ta algu diferente, pasobra e ta kai den e konstelashon hulandes. Ta gezaghebber ta tin e mando ei. “Ministerio di Hustisia ta e promé liña si ta trata di kombatí desaster.”
Defensa ta indiká ku nan ta bon prepará. “Henter aña nos ta prepará nos pa e tarea prinsipal aki ku diferente training”, Maartje van der Maas, bosero di Defensa Área Karibense ta bisa. “Ora e islanan pidi esaki nos por duna asistensia militar den forma di evakuashon di hende, limpiamentu di kayanan, sosten ora tin molèster di muchu awa etsétera.”
Awaseru dianan largu
Segun Coffie di servisio meteorológiko mas bia orkan a yega asina serka di e islanan ABC, pero kada sistema ta komportá diferente. “Thomas na 2010 a bini mas serka, pero tabata un sistema mas suak ku Matthew. Ke men ta posibel ku nos ta haña mas molèster tòg.” Segun Coffie Matthew ta trese espesialmente molèster di awa i esaki lo ta e mas pió mayan.”E orkan mes no ta bini aki ke men mayoria di e bientu lo hala bai, nos lo haña espesialmente hopi áwaseru. Komo ku Matthew ta pasa relativamente poko poko, e wer di awa lo keda dianan largu. E laster pida rabu por pasa te djasabra i wer di awa por keda te djadumingu.”
Outor Elisa Koek den kolaborashon ku koresponsalnan na Hulanda