Sentro Elektoral Sentral
PHILIPSBURG – Sentro Elektoral Sentral di Sint Maarten ayera unánimemente a disidí di konta tur voto di e elekshonnan di 26 di sèptèmber di nobo. Segun presidente Jason Rogers ta konfirmá ku tin votadó ku a vota miéntras nan no tabata inskribí na registro sivil.
No por kompletá e rekonteo di e binti distritonan di elekshon den un dia. Pa kada distrito e ofisina di elekshon mester di sigur un ora i banda di dos or a konta tres distrito so.
Serio
“Nos ta tuma e prosès verbalnan di e sentronan elektoral hopi serio”, segun Rogers. “A sali algun diskrepansia ku ta duna motibu pa konta e votonan di tur sentro elektoral di nobo.”
Rogers no tabata spesífiko tokante e diskrepansianan aki, solamente ku tin hende ku no tabatin derecho di vota ku a vota tòg.
Seis partido polítiko – ku eksepshon di National Alliance i United People’s Party – tambe a pidi un rekonteo kompleto, pero Rogers ta bisa ku e Sentro Elektoral Sentral ofishalmente a yega na e konklushon ku un rekonteo asina ta hustifiká.
E resultadonan di e rekonteo lo ta konosí pa mas trempan djamars.
E konteo di e promé dos sentronan elektoral a resultá den kuater voto balido ku anteriormente a konta komo no bálido i sinku voto bálido ku a deklará no bálido.
Asiento
No ta probabel ku e rekonteo lo trese algun kambio den e resultado final, ounke serka UP lo tin tenshon ta ken ta bai haña e di sinku asiento. Jules James a terminá dilanti ku 207-206 riba Tamara Leonard pa e posishon, pero entretantu nan a empatá. Si nada no kambia e asiento lo bai pa Leonard pasobra e ta mas haltu riba e lista di UP.
Outor Hilbert Haar