Ronald Plasterk den Tweede Kamer

Ronald Plasterk den Tweede Kamer

DEN HAAG – E debate tokante e presupuesto di Relashonnan den Reino ku a tene djamars i awe den Tweede Kamer, tabata dominá pa problema rònt di e refinerianan na Aruba i Kòrsou.

Alexander Pechtold (D 66) ke pa gobièrnu hulandes investigá kon e dil, entre Aruba i e kompania filial di e kompania di zeta di estado di Venezuela PdVSA tokante e refineria, ta hinká den otro. E ta prekupá pa e riesgonan finansiero, geopolítiko i tékniko di medio ambiente. Ronald van Raak (SP) ta haña ‘e dil masha malu mes ku por trese problema grandi pa Aruba.’

André Bosman (VVD) tambe tin miedu ku pa motibu di e refineria Hulanda ta hañ’é ta paga e debenan den futuro ku Aruba no por paga. Plasterk ta haña ku ta un asuntu di e pais Aruba, pero e ta añadí si ku Caft(College financiel toezicht Aruba) lo kontrolá e konsekuenshanan pa e presupuesto.

E debate parsialmente ta elaborá riba un debate resien tokante e influensha venesolano na islanan ABC.

Refineria Kòrsou
Pechtold ta reprochá gabinete Rutte 2 ku sea nan ta baha masha pisa mes riba e islanan òf nan ta ‘keda sinta riba nan mannan’. P’esei e ta prekupá pa e enfoke riba refineria Isla na Kòrsou. “Lo mi a preferá bon relashonnan, pero entretantu nos por bien kuminsá pinta e trapi di eskalashonnan ku t’ei sigur. I si na Kòrsou ta aseptá ku ta manda mucha di skol kas pasobra nan a haña gana di arohá, nos mester bisa: esaki no ta stèndert den Reino.”

Pechtold ta spera tambe ku minister Ronald Plasterk (Asuntunan Interior i Relashonnan den Reino) ta riba dje serka e negoshashonnan tokante refineria Isla. Aktualmente gobièrnu di Kòrsou ta negoshando ku un partido chines tokante un kòntrakt di lease for di 2019, ora ku e relashon aktual ku PdVSA terminá. Plasterk ta sigurá ku e ta riba dje.

E maneho di pobresa na islanan BES tambe a papia di dje. Diferente polítiko ta puntra unda e mínimo sosoial di e islanan BES ta keda. Por lo pronto Plasterk no ta menta un término. Van Raak a entregá un moshon pa establesé e mínimo sosial a base di e kostonan di bida. Roelof van Laar (PvdA) den un moshon (ku mas partido a firma) ta boga pa un investigashon di un bùdjèt mará na yu.

Outor Pieter Hofmann