Willem Banning (FNV) ta parti pamfleta na stathùis di Tilburg. Potrèt: Pieter Hofmann

Willem Banning (FNV) ta parti pamfleta na stathùis di Tilburg. Potrèt: Pieter Hofmann

TILBURG – Munisipio di Tilburg no tin muchu interes den un asina yamá areglo di indulgensia pa e víktimanan di kromo-6. Tilburg ke warda mira e investigashon promé. Bou di e víktimanan tin algun antiano.

Wèthouder Marcelle Hendrickx promé ku e reunion di rat di munisipio di Tilburg: “Nos ta tuma e kaso hopi serio. E problema ta ku ainda nos tin tiki informashon i p’esei mi por komprondé e inkietut masha bon. Nos promé prioridat ta salú di hende i p’esei ta eksaminá nan. Ta te ora esaki kore bon lo por trata e tipo di preguntanan aki (tokante un areglo di indulgensia).”

Pamfleta
Na entrada di stathùis tin desena di èks partisipante na e proyekto ta warda e miembronan di rat di munisipio i e kolegio. Tempunan ayá e kobradónan di ònderstant mester a las i raspa partinan di trein bieu. Nan tabata eksponé na asbèst, kromo-6 i metal pisá. Trahadónan di NedTrain tabata nenga di hasi e trabou aki pasobra nan tabata hañ’é muchu iresponsabel. Asina a sosodé ku ta kobradó di ònderstant na Tilburg a haña e trabou.

Si e kobradónan di ònderstant tabatin pregunta, tabata kita parti di nan ònderstant, asina e pamfleta, ku èks partisipante na e proyekto ta parti dilanti stathùis, ta bisa. Awor nan ke un despensa, un kompensashon finansiero pa e gastunan i indemnisashon pa e daño ku nan a sufri.

Areglo di indulgensia
Abogado Hustings ta yuda desena di e partisipantenan na e proyekto di ántes. “Ku esaki nos ke pidi atenshon pa e kaso aki. Munisipio ke tur echo riba mesa promé, pero un gesto lo ta bon.” Ku esaki e ke men e areglo di indulgensia, kaminda e víktimanan lo haña un adelanto. Trahadónan di Defensa a haña esaki kaba i pa NedTrain nan ta trahando riba algu meskos.

Tantu e trahadónan di Defensá komo esnan di NedTrain tabata eksponé na kromo-6 tambe. “Pero”, Willem Banning di sindikato FNV ku ta kombersá ku munisipio ta bisa, “esakinan tabata trahadó ku por a nenga e trabou. E partisipantenan na e proyekto, esta e kobradónan di ònderstant, lo a pèrdè parti di nan ònderstant si nan tambe a ninga.

Èks pelotero profeshonal Ivan Bernadina a keda ku keho di salú despues di un programa di re-integrashon di munisipio di Tilburg. Potrèt: Pieter Hofmann.

Èks pelotero profeshonal Ivan Bernadina a keda ku keho di salú despues di un programa di re-integrashon di munisipio di Tilburg. Potrèt: Pieter Hofmann.


Keho

Ivan Bernadina ta un di e víktimanan. “Henter mi bida mi a hunga beisbòl, na diferente klup profeshonal, mi tabata den selekshon antiano, tur kos. Mi tabata fet. Awor mi ta pèrdè rosea ora mi subi un trapi.”

No ta keho di pulmon so e tin. Su wowonan no ta bon mas i e tin iritashon na su kútis; fenómenonan ku ta típikamente relatá na kromo-6. “Espesialmente mi man robes ta hopi malu. Semper mi ta hunta krema promé ku mi sali kas”, Bernadina ta konta miéntras ku e ta mustra riba un otro èks partisipante di e proyekto. “Wak, e tin e den kara!” E mésun hòmber ei no tin djente mas. “Asta mucha muhé hóben ta kana ku problema di djente. Ami tambe.” Ku su lenga e ta pusha su djentenan di abou manda dilanti.

Melfried (41) tabata sufri kaba di líkido den su pia, for di promé ku e proyekto di re-integrashon esaki tabata limit’é. For di algun aña e mester bebe mas remedi, awor pa su kurason i kontra preshon haltu.”Mi no tabatin esaki algun aña pasá i mi ta hóben ainda”, e ta lamentá.

Alkalde
Peter Noordanus, alkalde di Tilburg, ta papia un ratu ku e medionan di komunikashon na yegada na stathùis, pero e no ta aster e èks partisipantenan di e proyekto. E ta hura ku lo tuma e hendenan na serio. E no ta haña ku ta tempu pa pidi despensa kaba.

Algu despues rat munisipal ta papia un ratu tokante di e kaso di kromo-6. Melfried: “Tur e kosnan aki m’a tende kaba serka e abogado. Awor atrobe nos mester warda. Mi por a bien keda sin bini.”

Outor Pieter Hofmann