Jeanoushka Raphaela – potrèt: OLB

Jeanoushka Raphaela – potrèt: OLB

KRALENDIJK – Bestuurscolleger di Boneiru, ku riba 3 di novèmber a pèrdè e mayoria den Konseho Insular, por keda. E tres diputadonan ta haña sosten di toleransha di UPB i e miembro di Konseho Insular independiente Jeanoushka Raphaela.

Raphaela riba 3 di novèmber a kibra ku e koalishon ku el a forma na mei ku MPB i e miembro di konseho independiente Esther Bernabela. Dos dia despues el a firma un deklarashon di boluntat ku su partido bieu UPB i Partido Demokrátiko( PDB) pa deliberashon tokante un koalishon nobo.

Rumbo
E deliberashonnan ei ‘pa diferente motibu’ no a logra, asina lider di UPB James Kroon i Raphaela ta skibi den un karta di gradesimentu na PDB. Ounke nan no ta menshon’é den nan karta ta manera nan no tin konfiansa den e stabilidat di PDB. Den e partido tin dos banda ku no ta di akuerdo ku otro tokante e rumbo. Miembro di Konseho Insular Michael Pieters siman pasá den un karta ekstenso a ekspresá su malkontentu ku e maneho di lider di frakshon Robby Beukeboom. Pieters ta pertenesé na e kampo di èks diputado i kabes di lista Clark Abraham.

PDB a reuní internamente dianan largu tokante e koalishon nobo ku tin e nòmber Patia 2 pa e kolónan di e partidonan PDB i UPB, kòrá ku bèrdè. Esaki no tabatin resultado ainda. E promé koalishon di patia a kai pasobra Raphaela i Bernabela a sali for di UPB. Awor Kroon a keda su so den konseho na nòmber di UPB, pero el a forma un aliansa ku su èks partidario Raphaela.

‘Sosiegu’
Miéntras e tres frakshonnan tabata papia tokante un koalishon nobo e kombinashon MPB-Bernabela, ku huntu tin kuater di e nuebe asientonan den Eilandsraad, a buska kontakto ku PDB, ku tin tres asiento. Riba esaki tampoko e Demokratnan despues di deliberashon interno no a reakshoná te aworakí. Pa no hinka Boneiru mas largu ku un koalishon di minoria UPB i Raphaela a disidí di para e negoshashonnan. “Na interes di Boneiru i pa laga sosiegu bini bèk”, Kroon ta bisa den un splikashon verbal.

Den un karta separá di nan tur huntu na gezaghebber Edison Rijna, Kroon i Raphaela ta skibi ku Raphaela ta retirá su karta di 3 di novèmber i ku nan tur dos lo ‘tolerá’ e Bestuurscollege aktual. Nan lo bai papia si ku MPB-Bernabela tokante adaptashonnan den e programa di prioridatnan pa e sobrá temporada di gobièrnu te mart 2019

Elvis Tsjin Asjoe – potrèt: OLB

Elvis Tsjin Asjoe – potrèt: OLB

Sosten di toleransha
Segun Elvis Tsjin Asjoe, lider di partido MPB no a sosodé anteriormente ku un kolega a haña sosten di toleransha na Boneiru. E ta kontentu ku awor tin sosten di seis di e nuebe miembronan di Konseho Insular. “Esei ke men ku nos por sigui ku loke nos a kuminsá.” Tsjin Asjoe ta sali for di e punto di bista ku e diputadonan, dos di MPB i un ku na nòmber di Raphaela ta den e kolegio, por keda te e próksimo elekshonnan.

Outor Gijs van den Heuvel