‘Enseñansa no ta trata solamente di aritmétika i idioma, ta trata tambe di desaroyo di bo identidat’- potrèt: Gijs van den Heuvel
KRALENDIJK – Enseñansa ke men tambe sinti bo seif na skol. Esaki ta konta pa hóbennan homoseksual tambe. Minister Jet Bussemaker di Enseñansa, Kultura i Siensia (OCW) ta boga pa esaki ta garantisá na skolnan di Boneiru, Sint Eustatius i Saba (Islanan BES) tambe.
“Mi ta minister di Emansipashon tambe. Mi ta haña e tópiko aki importante. Enseñansa no ta trata di aritmétika i idioma so. Enseñansa ta trata tambe di desaroyo di personalidat, desaroyo di bo propio identidat. Un hóben homoseksual òf lesbiana tambe mester por bai skol na un manera seif. Ainda tin un trabou di hasi aki.”
Si bo no ta heteroseksual e kos ta difísil ainda na Islanan BES, kaminda por ehèmpel tin hopi resistensia ainda kontra e matrimonio homoseksual. “Esei no ta un motibu pa stòp. Mi no ke preskribí niun hende kon nan mester biba nan bida. Pero mi ta resistí gruponan ku si ke disidí esaki pa otro hende.”
Durante su bishita na Boneiru minister Bussemaker a habri e skol nobo Papa Cornes – potrèt: Gijs van den Heuvel
Na Saba i Boneiru e minister tabatin enkuentro ku organisashonnan lokal ku ta sali na defensa di diversidat seksual (LHBT). Na Boneiru esaki ta e fundashon EQ. “Mi ta kere nan ta hasi bon trabou ku organisashon di aktividatnan sosial i dunamentu di informashon.” Den e kombersashon ei segun e minister a bin sali ku ainda tin basta difikultat pa enfrentá.
Bussemaker ke pa gobièrnu insular tambe duna atenshon na e tópiko aki. “Lo ta teribel si hóbennan LHBT bandoná Boneiru pasobra nan no ta sinti nan mes seif aki. Mi a bisa gezaghebber i diputadonan tambe ku esaki ta un tema importante pa mi.” E ta spera ku Bestuurscollege lo trata esaki tambe i ekspand’é.
Outor Gijs van den Heuvel