Rose Caines:”Nuebe di kada dies sabano hóben no ta papia hulandes bon, esei a kosta mi tambe dos aña.”

Rose Caines:”Nuebe di kada dies sabano hóben no ta papia hulandes bon, esei a kosta mi tambe dos aña.”

DEN HAAG – Bon notisia pa studiante di Hulanda Karibense: a adaptá e finansiamentu di estudio di BES. Awor nan por bai studia entre otro na Canada. Tweede Kamer awe a reuní tokante e proposishon di lei aki.

Saba a pidi pa deklará e finansiamentu di estudio BES bálido tambe pa estudionan na Canada, pasobra hopi studiante sabano i statiano ta preferá di studia den un pais di habla ingles ku na Hulanda. Reku nan idioma materno ta ingles.


Universidatnan kanades
Esther Henry, ku ta studia na Estádos Unídos, ta entusiasmá tokante e kambio binidero. El a buska informashon kaba tokante diferente universidat kanades. “Lo ta un diferensha di mas o ménos 5000 dòler. Pero e nivel di enseñansa na Canada ta mas haltu tambe” Awor e ke hasi su MBA na Canada.

Universidatnan merikano ta muchu karu
Rose Caines, ku ta biba na Hulanda, ta kontentu. E plaka di skol na universidatnan merikano simplemente ta muchu haltu. Caines:”E motibu mas grandi pa bai Canada lo ta pa kaba un estudio. Pero tambe pasobra lo ta mas barata.”
Na Canada Caines lo no tin molèster di e barera di idioma. Hopi statiano ta enfrentá esaki na Hulanda. “Nuebe di kada dies statiano hóben no ta papia bon hulandes, ami tambe a tuma dos aña pa mi siña. Tòg nan ta bini Hulanda pasobra studia ei ta barata, pero idioma ta hunga un papel importante.”

Otro kambio
E finansiamentu di estudio di BES riba otro terenonan tambe ta igual na e finansiamentu di estudio di Hulanda oropeo. E ta bálido tambe pa estudionan privá rekonosé.
Gobièrnu no ta finansiá estudionan asina, pero e studiantenan ta haña finansiamentu di estudio tòg. Esnan ku ta risibí finansiamentu di estudio di BES den futuro tambe por kuminsá un estudio na febrüari, na mitar di e aña akadémiko.

Studiantenan ku kambia di estudio ántes no tabata haña finansiamentu di estudio di BES na ougùstùs pasobra e ora ei e estudio bieu a para i e nobo no a kuminsá ainda. Pero gastunan di kosto di bida si tabata sigui normalmente i esaki tabata kousa problema finansiero. Meskos ku e finansiamentu di estudio hulandes oropeo awor ta paga esaki na ougùstùs.

Paga tur luna
Na petishon por adaptá e pago mensual di finansiamentu di estudio BES. Pa hopi studiante na universidatnan merikano no ta kumbiní pa paga tur luna, pasobra nan mester paga un suma grandi dos bia pa aña na nan instansia di edukashon.

Outor Pieter Hofmann