Jandino i Kenneth Asporaat – potrèt: Deya Mensche
WILLEMSTAD – 2017 ta pinta di ta un aña alentador pa Huis van Asporaat, e kompania di produkshon funda pa rumannan Jandino i Kenneth. Ret Karibense a kòmbersá ku e talentoso duo ta kreando pauta den e mundu farandulero Hulandes, ku varios obranan teatral i programa di televishon, i a probechá di nan estadia na Kòrsou pa trese e obranan ‘Van Je Familie Moet Je Het hebben’ i ‘Atrako’.
Apesar ku resensianan di ‘Atrako’ tabata miksto, tòg produktor Kenneth, di 28 aña, ta kere den produkshon kurasoleño i ta mira e importansia di promové nos artistanan.
Humor ta universal
Según Kenneth, humor ta universal i ora ta trata di un tema serio – den e kaso di ‘Atrako’ ta trata e ola di atrako ku ta asotando nos isla – ta usa humor pa laga hende mira e situashon di otro ángulo. Tambe rumannan Asporaat ta kere den pasa e batuta artístiko na talentonan kurasoleño manera Archell Thompson i Cynthia Martina.
Aña pasa Kenneth a mira Cynthia den un obra di su mes, i tabata asina impreshoná ku su aktuashon, ku ora e oportunidat a presenta pa trese ‘Atrako’ na Kòrsou, nan a ofrese un rol. E aña akí, Huis van Asporaat lo bini ku un show nobo di Jandino, titula ‘Keihard’, i tambe nan lo estrena un komedia nobo yama ‘Bon Ku N’e’, banda di varios programa di televishon ku ta den desaroyo. Pero na yüli benidero, Jandino lo tin un show kulminante huntu ku e talentoso komediante Najib Amhali, den stadion ‘De Kuip’, ku ta karga 40 mil hende.
Farándula na Hulanda
Pa ta eksitoso den e mundu di farándula hulandes, bo mester ta sigur di bo mes, Kenneth ta splika, i ta importante pa no laga niun hende bisa bo ku bo no por algu. E produktor ta konsehá e hóben pa no tene miedu di pensa grandi, pero pa kuminsá chikitu dor di invertí den su mes, hasí trabou boluntario i amplía su kontaktonan komersial. Nan ta atmití ku e mundu di farándula na Hulanda ta hopi duru i tur ora bo mester ta bon, pero ta konkluí ku na final di e kuenta ta bo mes mester hasi’e. “Ami ku Jandino ta ruman i ta traha huntu i e union ei ta nos forsa”, Kenneth a splika.
E tempu ku Jandino a kuminsá na 2002, i Kenneth na 2007, no tabatin hopi oportunidat pa hende di kolo, i Jandino ta e promé Yu Kòrsou den historia farandulero ku a logra e tipo di éksito komersial na Hulanda. “Esei ta bisa masha hopi mes di su determinashon i disiplina. Nos a bini di Buena Vista, fo’i un kas masha chikitu mes, pero esei no a wanta nos nunka”, Kenneth a splika.
Archell Thompson – potrèt: Deya Mensche
Según Archell Thompson, produktor i protagonista di e obra biográfiko ‘De Naakte Antilliaan’, fo’i dia ela kuminsá kolaborá ku Huis van Asporaat kuater aña pasa, ela eksperensia un kresementu artístiko inmenso. ‘De Naakte Antilliaan’ tabata su debut komo aktor i a kuminsá komo un ‘one-man show’, ku despues a bira un buki éksitoso.
Motiva
Motiva pa Huis van Asporaat, Archell a kuminsá produsí su propio produkshon, pa awó e tambe pasa e batuta na otro. E aña akí, Archell lo traha ku kuater dama ku lo konta di nan bida den un obra titula ‘Catwalk’. Archell ta atribuí su kresementu na e guia i motivashon ku e ta haña serka rumannan Asporaat. “Kenneth a bisa mi tur ora pa mi siña, asina mi tambe por motiva otro hende” Archell ta splika.
Outor Deya Mensche