Un di e krakernan a pone su bùs chikí dilanti Kas di Kòrsou anterior na Badhuisweg. Tras di e waiper tin un plachi di number kologá ku e teksto ‘Zona Limpi’- potrèt Pieter Hofmann

Un di e krakernan a pone su bùs chikí dilanti Kas di Kòrsou anterior na Badhuisweg. Tras di e waiper tin un plachi di number kologá ku e teksto ‘Zona Limpi’- potrèt Pieter Hofmann

DEN HAAG – Kas di Kòrsou a neglishá e edifisio, ta inventá mentira tokante kraker (okupadó ilegal di un edifisio) i no tin su papelnan na òrdu. Asina Joram Trijsburg, un di e hendenan ku for di desèmber 2016 a krak (okupá un edifisio ilegalmente) Kas di Kòrsou na Badhuisweg 175 na Den Haag, ta bisa.

For di e tempu ei un fundashon kontra krakmentu ta manehá e residensia ofishal banda di e edifisio ku a krak.

Minister plenipotensiario di e tempu ei Marvelyne Wiels a reakshoná furiosamente kontra e krakernan, segun Trijsburg. Segun e, el a menasá di pega e edifisio nan kandela ku kraker ku tur. Djei e krakdónan a hasi denunsio di menasa i intimidashon. “Nos no a tende ainda kon a sigui.”

Pero derecho penal ta trata e krakernan tambe. Ministerio Públiko ta sospecha nan di kiebro i ladronisia. E último keho entretantu a kaduká despues ku reshèrshi a konstatá ku no a hòrta nada. Tampoko no ta trata di molèster manera Kas di Kòrsou a trese dilanti den korte. E garashi dilanti di e residensia ofishal lo tabata ‘inabitabel’ pero lo kontrario parse ta bèrdat. Entre tantu e garashi ta aksesibel pa e minister plenipotensiario nobo pasobra e krakernan no tin mester di e espasio ei mas.

Neglishá
E edifisio ta den un estado neglishá, Den e espasio ku a dekorá komo sala riba e piso abou pleister ta bini abou. “Pasobra tin añanan largu ku no tabatin mantenshon. Ta djis tabata pasa un kuashi. Si keda sin kalentá un edifisio asina añanan largu tambe ta desastroso”, Trijsburg ta bisa.

Na diferente lugá tin sker den e murayanan, i un di e portanan di e kamber ta habri di mes pasobra e parti ost di e edifisio a sak. Segun Trijsburg e rampinan di glas armá den chumbu ta falta.

Manera ta konosí e kushina original tambe a disparsé. “M’a tende di hende di Kas di Kòrsou aktual ku a ward’é un kaminda, pero no den Kas di Kòrsou nobo. Straño ku no ta hasi nada ku un kushina di 30 mil euro” e kraker ta bisa.

Balor di benta
Kas di Kòrsou entretantu a bende e edifisionan pa 3 mion euro na dos kompania di propiedat inmóbil. E kondishon ta si ku Staten – despues di un aña i mei – lo bai di akuerdo lihé.

E preis di benta ta hopi bou di e balor bèrdadero, e kraker ta haña. “Nan a bend’é pa e mésun preis ku e edifisio nobo, pero no segun e preis real di e edifisionan aki – inkluso e residensia ofisial na e otro banda di kaya. No ta straño ku bo ta bende kos di tantu balor asina bou di e balor di merkado?

Sentensia
Wes ta sentensiá djabièrnè. E ora ei e krakernan ta tende si nan mester sali for di e edifisio. Si ta sí nan mester sali pa mas tardá djamars 17 di yanüari. Trijsburg: “Mi tin bon speransa ma bo no sa nunka. Di tur manera e kos a stroba wes ku Kas di Kòrsou den un prosedura asina kòrtiku a entregá dokumento te na delaster ora miéntras nan tabatin nan lunanan largu kaba. P’e motibu ei apénas nos por a defendé nos mes.”

Outor Pieter Hofmann