Kontra e lus di solo ku ta baha treiner Anita Smits tin difikultat di distinguí e landadónan – potrèt: Gijs van den Heuvel

Kontra e lus di solo ku ta baha treiner Anita Smits tin difikultat di distinguí e landadónan – potrèt: Gijs van den Heuvel

KRALENDIJK – E sinkuenta miembronan di e klup di natashon Barracudas na Boneiru tur dia ta trein den laman. No tin un pisina adekuá na Boneiru. Tin plan si pa un pisina ku mester ta disponibel na 2019 pa e klup i otro gruponan di interesado.

E treinen den laman tin konsekuensha pa e miembronan di e klup ku ta partisipá na kompetishon di natashon i waterpolo, pasobra nan no por trein bou di mésun sirkunstanshanan ku nan konkurentenan. “Tin bentaha tambe”, presidente Simone Sweers ta relativá djis despues di un treinen na bulevar. “Bo ta haña forsa pasobra ta trata di koriente i movementu di ola.” Tòg un pisina ta un prioridat pa Barracudas.

Si ta na Fundashon Kas Boneriano (FCB) lo drecha i amplia e pisina bieu serka Jong Bonaire na Antriol ku e intenshon pa tur sorto di grupo us’é. “Nos ke hasié un pisina ofishal di kompetishon, ku ta adekuá pa waterpolo tambe”, e konsehero di maneho Jacqeline van Tilburg di FCB ta bisa. “Loke di tur manera nos ta haña importante ta ku mucha di skol mester siña landa. E echo ku no tin landamentu di skol pa nos ta un falta.” Ademas lès di landa den laman ta difísil pa motibu di por ehèmpel lèbèlèbè di awa i sushamentu.

FCB a kumpra e tera pareu ku e tereno kaminda Shark (proyekto di biba bou di guia) ta konstruí i e kaminda ku e edifisionan nobo band’é dje di Fundashon Kuido di Adikshon i Sikiatria Hulanda Karibense (SVP-CN) lo bini. Direktor di FCB Ben Oleana ta bisa ku ta te fin di 2017 lo kuminsá ku e pisina. E plannan ta den e fase di kuminsamentu ainda. Ta laga Talent Ontwikkel Programma (TOP) pa profeshonalnan den gobièrnu hasi e preparashonnan.

Van Tilborg: “Nos a pone e petishon pa supsidio ei i nan a aseptá e proyekto. Awor nan ta investigando e posibilidatnan pa e renobashon, pero tambe pa e ekplotashon di e pisina.” Serka esaki ta pèrtenesé tambe e trahamentu di e presupuesto i e determinashon di e gruponan.

“Nos ke bai papia ku tur hende, pero nos no ke un pisina públiko. Sino e ora ei nos no tin e kòntròl riba dje mas”, segun Oleana. “Nos ke hasié pa pueblo, pero mester por kubri e gastunan si.” FCB ta spera riba supsidio di Hulanda, pasobra e ora ei por baha e hür. Oleana ta ferwagt ku e pisina por ta kla fin di 2018 òf 2019.

Barracudas ta sigui e plannan ku hopi interes. Tin sufisiente talento na Boneiru, Sweers i treiner mayó Anita Smits ta haña. E talento hóben Chenice Bergman na novèmber a sali promé den un torneo internashonal na Aruba. Ta perhudiká e tipo di talento aki awor. Smits ta bisa. “Por ehèmpel bo no por trein start i sèt i bira na muraya. Aktualmente nos mester trata di trein esaki den un par di ora promé ku e kompetishon, pero no ta algu ku e landadónan por hasi outomátikamente.”

Banda di esaki e landadónan ku solamente konosé awa salu mester kustumbrá ku awa di pisina. “E ora ei bo téknika no ta klòp mas.”

Outor Gijs van den Heuvel