Pasaheronan ta warda pa check in na Aeropuerto Flamingo – potrèt: Belkis Osepa
KRALENDIJK – Un konekshon aéreo ku region ta di importansha vital pa Boneiru. Sin un konekshon asina Boneiru ta keda isolá i un parti di e turistanan lo no bini. Awor ku e krísis na InselAir a tochi fondo ora ku a tene un gran parti di e flota abou, na Boneiru e gritu pa un propio solushon ta krese. E isla ta mas ku hartá di e retrasonan i kanselashonnan.
Bonaire Business & Employers Association (BBE) a bini ku e proposishon di mas konkreto: lanta un komishon hanchu pa riba término di mas kòrtiku posibel solushoná e problemanan: ‘mihó ayera ku awe’. Entretantu tantu MPB komo partido di oposishon PDB a brasa e idea.
Yamada urgente
Reino i gobièrnu lokal mester tuma akshon, e direktiva di BBE ta bisa den un ‘yamada urgente’ na tantu mandatario lokal komo di Den Haag, tres ministerio i e instanshanan konserní na Boneiru.
Awor mester tuma akshon lihé, presidente Anja Romeijnders ta bisa. “Kada be nos a trese e problema dilanti. Awor porfin mester bini un bon solushon. Nos a manda nos karta tambe pa dos funshonario haltu di maneho di aviashon di Ministerio di Infrastruktura i Medio Ambiente. Nan tin konosementu di aeropuertonan manera Schiphol, Lelystad i Eelde. Nos ta spera ku nan por yuda nos riba término kòrtiku.”
MPB komo partido di oposishon aña pasá a atvertí kaba. Awor ku e partido ta den koalishon, Milena Silberie na nòmber di e frakshon ta pidi pa den tres siman forma un komishon ku ekspertonan di turismo i aviashon i preferiblemente un eksperto finansiero tambe. Nan mester bini ku un plan pa término kòrtiku den dos luna i di término largu den ocho luna.
Ménos turista
“Mester tin un konekshon konfiabel pero seif tambe”, asina Romeijnders, ku ta referí na e señalnan di mal mantenshon na InselAir,a bisa. “E konekshon entre islanan ABC pa Boneiru ta esun di mas importante. Hopi turista ta skohe pa bai Boneiru via Kòrsou i Aruba na lugá di direktamente. E turistanan ei nos ta pèrdiendo mas i mas pa motibu di retraso i kanselashon.”
No ta ekskluí lantamentu di un propio kompania. “Ounke esaki lo no por kubri e gastunan mésora, nos por wak si. Gobièrnu por koperá ku un garantia.” Reino tambe tin un responsabilidat den esaki. “Meskos ku Kòrsou ku ta bisa awor ku InselAir ta den interes di e pais.”
Partido di oposishon PDB ta haña ku Bestuurscollege ta traha muchu slo. “Lanta fo’i soño i hasi algu”, èks diputado Clark Abraham ta bisa. BC anteriormente kaba a bisa ku nan ta buska ku tin alternativo pa Insel Air, pero nan no a presentá nada konkreto ainda.
Outor Gijs van den Heuvel