PHILIPSBURG – No ta difísil pa hui for di prizòn Pointe Blanche di Sint Maarten òf kuminsá un revolushon den e prizòn. Direktor di prizòn Edward Rohan ta haña nesesario pa mustra ki riesgo e i su personal ta kore.
E hèkinan rònt di e prizòn ta kibrá i un gran parti di e muraya di prizòn no t’ei. E muraya ei a bai ora orkan Gonzalo a pasa na 2014 i pa motibu di falta di plaka nunka mas no a drech’é. Ademas e generator di emergensia ta mes bieu ku e prizòn i regularmente e ta dañá, asta ora koriente bai riba e isla.
Direktor di prizòn Edward Rohan ta mustra ku hèki i parti di e murayanan di Pointe Blanche ta falta for di tempu di e orkan na 2014 – potrèt: Natasja Gibbs
Tin un kaminda so pa drenta i sali e prizòn. Si bini un revolushon i blòkia e kaminda ei e personal di prizòn literalmente ta haña nan mes pará kontra un muraya kibrá.
For di muraya mes por saka arma
Den e plenchi di e departamento di muhé Rohan ta mustra riba un pida heru di betòn ku ta sali for di e flur. “Wak, esaki ya kaba ta un arma di hinka potenshal. Nan ta sleip e pida herunan mes largu te ora nan por traha un kuchú kuné. Nos a haña hopi kaba i esaki ta sosodé den henter e prizòn.” E armanan di hinka literalmente ta sali for di un muraya kibrá.
Heru di betòn ta sali for di muraya i flur (r) Kla pa sleip traha arma di hinka kuné (d) – potrèt Natasja Gibbs
Regularmente ta haña telefon selular i resientemente un arma di kandela tambe den e prizòn.
E direktor ta konvensé ku ta un grupo di wardadó di prezu di anochi ta trese e artíkulonan prohibí aki paden.
Den e kamber di wardadó tin un wardadó tras di ocho pantaya di computer miéntras ku su kolega den entrada ta kontrolá bishitante na man pasobra e mashin di skèn ekipahe ya tin simannnan largu ku e ta dañá – potrèt: Natasja Gibbs
Falta di wardadó di prezu
Na diferente departamento por ripará ku apénas tin wardadó i tin bia no tin niun mes presente. “Ta pa motibu di e falta di personal”, e direktor di prizòn ta konta. “E departamento di muhé hopi bia ta via un kámara so nos ta vigilá nan. Bon mirá mi mester kuminsá e programa di den dia ku 18 wardadó riba 135 prezu. Ma mi mester ta kontentu si mi por haña 5 pa 7 hende.”
E situashon aki ta dura añanan kaba
E komishon hulandes di kontinuashon den su reportahe di kontinuashon tin añanan ta insistí pa drecha e grupo di personal: ‘tin mas hende ta kobra salario ku tin ta bini trabou’.
Segun e direktor di prizòn no ta asina fásil. “E hendenan riba e lista di pago mi no por usa pasobra nan no sa kon ta traha ku detenido. Mi no por pone nan riba otro departamento tampoko. Mi mester bai papia ku minister Rafael Boasman (Hustisia) tokante un solushon. Esaki ta bira di sinku bia ku mi mester konvensé un minister nobo.”