WILLEMSTAD – Festival di tumba, e fiesta di muzik kaminda artistanan lokal ta lucha pa e korona den e marcha di karnaval; e aña aki antianonan na Hulanda no por a mir’é grátis na televishon na Hulanda.
E Rei di Tumba 2017, Amos Balentin (36) den historia di Tumba di Karnaval ta na di dos lugá den e kategoria ‘artista di tumba mas koroná’. Na Hulanda semper Balentin por a mira e temporada di karnaval na televishon.
Nostalgia
“No ta tur ora tabata agradabel pa sigui e eventonan na Kòrsou for di Hulanda, pasobra mi tabata haña nostalgia. Tòg mi no ker a pèrd’é. Tabata mi soño pa un dia partisipá na Festival di Tumba komo kantante i mi a pensa un bunita konsepto. Mi tabata sigui e kompetishonnan di Tumba live tur aña pa wak si ainda mi konsepto tabata úniko.”
Amantenan di Tumba na Hulanda e aña aki a paga 79 euro (150 florin) pa por mira e festival na televishon hulandes. Balentin di un banda no ta haña esaki mal idea, ‘pasobra e ta keda business’. E ta haña lástima si ku e televidentenan na Hulanda a tende te na delaster momentu ku nan mester a paga.
‘Nos kos’
“Na Hulanda mi a kuminsá kanta. Hulanda a hasi mi artista. Mi fannan, famianan i amigunan ta leu for di kas, leu di nan roots. Ta lástima pa mira ku nan, i entre nan mi mes yunan, ta haña difikultat pa por eksperensiá un fiesta kultural na televishon di Hulanda. Ta nos kos. Ounke e Antianonan aki ta biba leu fo’i kas, ta nos hendenan. Manera mi Tumba ta bisa: ‘un fiesta di pueblo e ko’ ’ki ta, un fiesta di nos ku nos’, Balentien ta haña.
Karnaval 2017 si RTV-8 ta transmití no solamente na Kòrsou pero entre otro na Hulanda tambe. Curaçao Carnaval Goes Global (CCGG) ta pasa e marcha di karnaval online na ocho idioma. “Mi ta haña e inisiativa bon pa transmití e marchanan di karnaval grátis na Hulanda pasobra Tumba ta un estilo di muzik úniko. Bo mester profundisá pa bo komprond’é”
Marcha di Despedida
E Rei di Tumba 2017 ta bai gosa espesialmente di e último òptògt di karnaval mayan, e marcha di despedida. E ta kontentu ku antianonan na Hulanda i televidente ku no ta papia papiamentu maske t’asina sí por eksperensiá Karnaval 2017 live.