WILLEMSTAD – Lo pone dos agente polisial èkstra durante reunionnan di Parlamentu miéntras ku lo prohibí parlamentarionan di drenta sala di Parlamentu ku arma. Tambe lo kambia e posishon di e stulnan den sala di tal manera ku parlamentarionan no ta sinta mas ku lomba pa porta.
Esaki ta e medidanan di seguridat ku presidente di Parlamentu di Kòrsou, Gilmar ‘Pik’ Pisas, a tuma despues di e insidente di dia 23 di febrüari último. Riba e dia ei durante un reunion públiko parlamentario Jacinta Constancia di MFK a dal parlamentario Giselle Mc William di frakshon di MAN un wanta den kara. Constancia ketu bai ta detené akusá di maltrato físiko i menasa.
Gilmar Pisas den kòmbersashon ku José Manuel Dias
Ocho agente polisial
Ku e medida aki Parlamentu di Kòrsou lo disponé awor di ocho agente polisial pa garantisá seguridat tantu paden komo pafó di e edifisio. “Pa trese trankilidat bèk bou di parlamentarionan lo pone un polis na kada banda di e porta prinsipal den e sala di Parlamentu”, Pisas a duna di konosé.
Den pasado Parlamentu tabata disponé di 22 polis pero mester a redusí esaki na seis agente polisial debí na e grado haltu di inseguridat di pais den su totalidat i tambe pa falta di sufisiente polis.
Stòp di bai personal
No opstante di e medidanan èkstra Pisas ta di opinion ku e seguridat den Parlamentu ta dependé di e propio parlamentarionan i di ningun otro hende. “Ta nos komo parlamentarionan mester kuminsá siña atendé ku e tópikonan i stòp di bai personal”, Pisas ta enfatisá.
Sala di Parlamentu di Kòrsou – Pòtrèt José Manuel Dias
Arma den Parlamentu
Un karta a sali pa tur parlamentario den kual ta partisipá ku no por drenta ku arma den sala di parlamentu. Te ku aworakí no tabatin prohibishon pa parlamentarionan ku tin pèrmit pa karga arma drenta Parlamentu ku nan arma. Segun Pisas aktualmente tin dos parlamentario ku ta karga arma, pero no tabata dispuesto pa divulgá nan nòmber.
Segun Pisas den kuadro di inmunidat parlamentario lo no listra e parlamentarionan riba kargamentu di arma i ta sali for di e punto di bista ku nan lo sa di kumpli ku e regla aki kabalmente.
Djabièrnè dia 3 di mart tin kontinuashon di e reunion públiko di dia 23 di febrüari ku a keda di skòrs pa motibu di e insidente ku a tuma lugá. Esaki ta nifiká introdukshon di e medidanan di seguridat èkstra.