Portrèt: Gijs van den Heuvel

KRALENDIJK – Komo úniko kandidato pa elekshonnan di Tweede Kamer di 15 di mart Jeroen Recourt (PvdA) ta kore kampaña na Boneiru. Kandidato pa D66 Antje Diertens tabata na Boneiru un ratu dos siman pasá, pero no a tene mas ku un enkuentro pa esnan interesá.

Recourt a drenta barionan den un estilo berdadero di kampaña pa kombersá ku hende i parti foyeto. El a skohe pa e pueblo Rincon, ku ta keda 20 kilometer for di Kralendijk. “Pasobra mi sa ku hende di Rincon no ta bini Playa dje lihé ei.”Na Kralendijk tin un town hall meeting.”

No por papia di un atmósfera di elekshon na Boneiru. Niun kaminda no tin bandera di partido ta kologá na pal’i lus manera ora di elekshon lokal, òf potrèt ku kabesantenan di lista. Den medionan di komunikashon tampoko no tin masha interes.

Deber

Recourt, èks wes di Aruba, ta haña ku ta e deber di polítikonan di Den Haag pa bini e islanan tambe. “Boneiru estatalmente ta pertenesé na Hulanda. Tweede Kamer ta trata di Boneiru Saba i Statia tambe. Si bo ke pa demokrasia kuminsá biba bo mester t’ei. Bo mester tende ta ki problema tin.”

Na Rincon e mester buska e votadónan di kas pa kas pasobra no tin kaya ku hopi hende kaminda bo por topa votadó riba kaya.

Di kas pa kas Jeroen Recourt ta trata di konvensé votadónan – Potrèt: Gijs van den Heuvel


Nada den e programa di elekshon

Den e programa di elekshon di PvdA no tin kasi nada tokante e islanan, Recourt ta atmití ku un poko bergwensa. Pero e konosé e problemanan di Hulanda karibense, e ta sigurá e hendenan ku e ta papia kuné. Pobresa i ònderstant ta para riba agènda añanan largu kaba. “Mi no por subi e salarionan”e ta bisa un señora. “Nos ta keda lucha pa introdusí un mínimo pa eksistí.”

Tin tópiko aktual tambe. InselAir i e rebaho grandi riba penshunnan pa ámtenarnan. “Legumai e reglanan. Mester tin komunikashon via avion pasobra aki esei ta manera tranporte públiko. I den e asuntu di bahamentu di penshun tambe reglanan no realista ta hunga un papel. Recourt ta haña ku Den Haag su trabou pa e islanan hopi bia ta bai direkshon di Hulanda na lugá di bai e islanan..

Kombersashonnan mas largu
Segun e sondeonan Recourt komo number 23 no tin niun chèns riba lista di PvdA ku e por bolbe bèk den Tweede Kamer. E ta spera di logra pone ku hende ta bai vota. Na 2012 ni 25 porshento no a bai vota. “Si bo no bai vota no ta skuchá bo i kos lo no drecha.