Portrèt: Extra

WILLEMSTAD – E asesinato kruel ku a tumá lugá djasabra ultimo na Berg Altena, na altura di Alaska Snek, unda Reegi Angelista (32), Elery Cijntje (39), Harold Francisca (48) i Purcival Brooks (54) a pèrdè nan bida, a laga habitantenan di bario den un estado di shòk. Lamentablemente no ta promé biaha ku na e mes un sitio ta asesiná hende i habitantenan ta sklama pa hustisia. Bisiña i e enamorada di defuntu Elery Cijntje, Aldrienne D, ta ekspresá nan dolo pa ku e perdida di nan ser kerí.

Aldrienne, ku tambe ta di Sintiago, ta papia di un bario chikitu i rustig unda generashon tras di generashon ta biba trankilo banda di otro. “Mi tabata na kas di mi wela, i promé m’a kere ku tabata klapchi. Ora m’a kuminsá tende sirena, m’a realisá ku ta algu mas grave i m’a kuminsá yama Elery, pero mi no a hañ’e”, Aldrienne a splika awa na wowo.

Un reportahe di Deya Mensche

Habitantenan di Sintiago konsolando otro. Pòrtrèt: Deya Mensche

Uní
Gisela tambe tin grato memoria di su bisiña Elery i e notisia di su asesinato a kai manera un baño di awa friu. “Nos ku nos ta biba, bebe, baila i yora huntu i nos ta biba hopi uní”, Gisela a añadí. “Elery tabata un tata dediká i tabata kuida su yu masha bon. Lo mi kòrda tur e momentu nan ku mi a kompartí ku n’e e delaster nuebe añanan”, Aldrienne a kompartí.

E konosido barbero Jó di Hanchi Kontentu, situá entre La Mina i e kantor di number, tambe a splika ku bisiñanan a pasa den un gran sustu ora e asesinatonan a tumá lugá i ku no ta promé biaha ku algu asina trágiko ta pasa. “Tur defuntu ta konosí di mi i m’a kore bai mira kiko a pasa. Pa mira nan asina benta abou tabata algu troumátiko”, Jó a splika. “Hopi hende a kuminsá haña miedu, paso ta seis hende kaba a muri na mes kaminda, entre e punta di snèk pa Alaska.”

Baluartenan di Hanchi Kontentu. Pòrtrèt: Deya Mensche

Hustisia
Notabel ta e dolo den stèm di Gisela i Aldrienne, unda nan ta pidi pa testigu bin dilanti pa por trese e asesinonan na hustisia. “Un hende mester a mira algu i nan mester bini dilanti”, Aldrienne a supliká. “Ta inkreibel pa mira kon algun hende sin kurason por yega kara habri i masakrá hende inosente asina. Ta un masakre e kos akí tabata”, Gisela a deklará indigna.

Jó na su turno ta pidi mas kontrol di arma den e bario, manera minister di hustisia ‘Kid’ Martina a primintí. “Hopi biaha ta hende di otro bario ta bin hecha baina i asina ta daña e nòmber di e bario”, Jó a splika. Djabièrnè awó habitantenan di Monteverde lo organisá un Kaminda di Krus, i Jó ta urgí pa esaki kuminsá na e sitio di e asesinato na asina purifiká e kaya. “Asina’ki no por sigui i nos mester trese pas i trankilidat bèk den nos bario.”

Kaya di defuntu Elery Cijntje. Pòrtrèt: Deya Mensche