KRALENDIJK – For di novèmber di 2016 diesdos ámtenar ku edukashon haltu na Boneiru ta sigui e programa di desaroyá talento na Boneiru (TOP Bonaire). Ku e programa aki ministerio di Asuntunan Interior i Relashonnan den Reino (BZK) ke mantené talento hóben i profeshonal pa Boneiru. BZK ta bisa ku lagando e ámtenarnan hóben aki yuda nan propio desaroyo lo reforsá e poder di gobièrnu.
Desaroyo tambe ta pará dilanti serka e partisipantenan Michèle Celestijn-Knuf i Dianne Boelmans. Knuf ta hurista fiskal E ta traha komo kolaboradó kobramentu na Belastingdienst Caribisch Nederland. Un bon futuro ta importante no solamente p’e mes: “Mi a nase i lanta aki i mi ke keda aki. Boneiru ta den desaroyo i p’esei mi a tuma e oportunidat aki ku dos man.”
Planólogo Boelmans entretantu ta sinti su mes bonerianu, ounke ku el a nase na Hulanda. E ta traha komo konsehero di maneho na Desaroyo Espasial di Entidat Públiko Boneiru. E ke keda na Boneiru i p’esei e ke sigui desaroyá su mes. “Na EPB e posibilidatnan ta limitá. Si aki no ta posibel pa desaroyá mi mes kisas lo mi bai.”
Masterclass
E profeshonalnan hóben den blòki di dos dia pa siman ta haña training di spesialista. Banda di proyekto konkreto ta traha espesialmente na desaroyo mas aleu di nan kapasidatnan. Ademas e partisipantenan ta haña coaching individual ku bista riba nan desaroyo personal. “Un parti esensial di e programa, un bunita komplemento”, Knuf ta haña. Riba 25 di aprel tin un masterclass tokante liderasgo.
TOP teambuilding brantwer. Potrèt: TOP
E diesdos partisipantenan di TOP ta profeshonalnan lokal ku nan dunadó di trabou a rekomendá nan. E kondishon tabata ku nan ta traha na gobièrnu. “Nos ta trata di sostené e kapasidat, konosementu i e forsa di organisashon di gobièrnu sentral, EPB”, e kolaboradó di maneho Axel Alders di BZK ta splika. “Huntu ku e entidatnan públiko nos ta responsabel pa bon maneho riba e islanan. TOP ta trata di mantenshon i desaroyo mas aleu di forsa atministrativo.”
Serka Knuf i Boelmans di tur manera esaki tin efekto. Pa Knuf esaki a trese su próksimo oportunidat kaba. “A ofresé mi un trayekto di siñamentu pa bira lider di tim. Asina TOP ta un “win-win”. Boelmans ta anhelá e próksimo parti di e programa. “Eiden ta trata di desaroyo personal i koperashon interkultural. Nos lo bai probechá hopi di esaki.”
Komunidat
Tur esnan envolví ta ferwagt ku TOP Bonaire lo sigui despues di e pilot aki. “Esei lo bini sigur”, kordinado di e proyekto Damaly Linkers ta bisa ku siguransa. “Na yanüari tabatin un evaluashon. Ku e feedback nos ta okupá kaba ku otro aña”. Alders tambe ta entusiasmá. “Asina nos ta forma un komunidat. E promé grupo por yuda e próksimo grupo, guia nan i sostené nan. E programa aki lo bai dura largu.