WILLEMSTAD – “Promé ku mi a baha komo minister mi a duna enkargo na Stichting Overheidsaccountantsbureau (SOAB) pa revisá tur prosedura di e Fondo di Kriminalidat i introdusí un mihó sistema di ‘checks and balances’ ku ta garantisá uso korekto di e plakanan konfiská den kaso Bientu.” Asina eks minister di Hustisia Ornelio Martina (PNP) a duna di konosé.
Martina ta teme ku lo por bini preshon eksterno riba e personal ku ta traha ku e Fondo di Kriminalidat pa faboresé finansiamentu di sierto proyektonan. Esaki en bista ku próksimamente e fondo aki lo bai disponé di sumanan di plaka astronómiko ku a keda konfiská den entre otro e kaso Bientu (72.5 mion florin) i tambe sènnan proveniente di benta di propiedatnan ku a keda konfiská pa Afpakteam.
Eks minister Ornelio Martina den kòmbersashon ku José Manuel Dias
Den un veredikto fechá dia promé di aprel 2016 den e kaso Bientu, Korte di Promé Instansia a ordená konfiskashon di 72.5 mion florin for di Robbie Dos Santos, doño di Robbie’s Lottery. E suma di plaka aki ta repartí den vários kuenta bankario na Merka. Dos Santos a keda kondená entre otro pa labamentu di plaka i falsifikashon di deklarashon di impuesto.
Plaka no a yega ainda
“E plakanan ku a keda konfiská na Merka den kaso Bientu no ta riba kuenta di Fondo di Kriminalidat ainda i Ministerio Públiko (OM) ta kanando e proseduranan korespondiente pa e plakanan aki bini liber.” Asina Norman Serphos bosero di OM a duna di konosé. A base di tratadonan eksistente no ta tur e suma di 72.5 mion florin ta bini pa Kòrsou. Un parti lo keda pa outoridatnan merikano miéntras ku St. Maarten tambe lo haña un parti pa su kolaborashon den e investigashon di e kaso.
Ofisina prinsipal di Robbie’s Lottery – Pòtrèt José Manuel Dias
Regla i prosedura
Solamente proyektonan ku tin komo meta prinsipal kombatí kriminalidat ta bini na remarke pa hasi uso di plakanan di Fondo di Kriminalidat. E petishon ku drenta mester pasa den dos komishon. E promé ta un komishon interno ku ta analisá e petishon i ta duna un konseho. Seguidamente ta manda e konseho aki pa un komishon eksterno ku na su turno ta bolbe repasá e petishon i ta duna un konseho final. Finalmente ta manda e konseho final pa e minister di Hustisia por tuma un desishon. E minister por pone e konseho final un banda basta ku e por argumentá esaki.
Eks minister di Hustisia Ornelio Martina ta bisa ku el a bai laga e Fondo di Kriminalidat atras ku 7.5 mion florin den dje destiná pa proyektonan nobo miéntras ku a reservá 4.5 mion pa e proyektonan koriente.