Pòrtrèt: Dulce Koopman

WILLEMSTAD – Fundashon Kas Popular (FKP) ta prosesando interes di vários instansha finansiero ekstranhero ku ta interesá pa invertí den e mega proyekto di bibienda, Wechi. Arthur Con, direktor di FKP a bisa Ret Karibense, ku FKP ta obligá na konsiderá invershon di sèn djafó, pasobra ehersisionan pa lokalmente haña finansiamentu, ainda no tabatin éksito.

Arthur Con:” E invershonistanan ekstranhero a tende dje proyekto di Wechi i nan ta hopi interesá pa partisipá pa medio di finansiamentu”. Wechi ta un proyekto di kas sosial ku ta kosta mas ku 400 mion florin i ku mester realisá den 10 pa 15 aña.

Finansiá
FKP a aserká bankonan lokal ku e petishon pa finansiá e proyekto a base di un interes abou, di ménos ku 5 porshento. Segun Con, awendia ta kosta kasi 100 mil florin pa traha un kas di dos kamber. Esaki ta pasobra preisnan di material a subi, kompará ku 10 aña pasá. Ora ku fia 100 mil florin pa traha un kas, na interes di 5 porshento esei ta nifiká ku mas ku 400 florin pa luna ta bai na paga e banko bèk.

FKP no ta haña reakshon positivo di bankonan lokal pa un finansiamentu abou di maksimalmente 3 porshento. “Nos ta haña e kontesta ku esaki no ta posibel. Solamente si Banko Sentral hasi eksepshon i duna pèrmit na e bankonan pa nan hasi uso dje reservanan ku nan tin, ku aktualmente ta generando sero porshento.” E direktor di FKP ta splika ku si FKP por haña e sèn ei pa usé den proyektonan di kas sosial, ku aprobashon di Banko Sentral, e bankonan lokal ta dispuesto pa finansiá proyektonan pa kas sosial, na interes di tres porshento.

Arthur Con: ”Pero ora ku nos puntra Banko Sentral, kon ta pará ku esaki, e no ta kontestá. Pero nos no ta entregá i ta keda insistí ku nos mester por finansiá e proyekto ku instanshanan finansiero lokal tambe.

Normanan
Presidente di Asosiashon di Bankero, Daniel Hodge, ta lamentá si resultá ku ta solamente instanshanan finansiero di eksterior lo partisipá den Wechi, pasobra naturalmente invershon lokal den e proyekto tambe ta deseabel. Sinembargo tin norma i reglanan di indikashon ku bankonan lokal mester kumpli kuné. Esaki ta nesesario pa e bankonan ta saludabel i pa e klientenan por ta trankil i tin e konfiansa ku nan sèn na banko ta sigur.

Supsidio di hür
FKP tin 8.400 famia inskribí pa un kas. Mayoria dje famianan no tin entrada sufisiente pa un hür normal. Si nan haña un kas nobo di 400 florin, tòg nan mester di supsidio di hür.