WILLEMSTAD – Ku shete asiento, partido PAR a proba di ta e alternativa real ku pueblo di Kòrsou un bes mas ta hinka su fe aden. Den e kampaña elektoral akí 11 partido a partisipá, pero PAR, MFK i MAN a proba di ta e ganadónan máksimo di e elekshon akí. E gran perdedónan tabata partido Nashonal, Pueblo Soberano i Un Kòrsou Hustu, ku kada un mester a entrega un asiento.
Aproksimadamente 80.070 persona a hasí uso di nan derecho di vota, i esei ta 1056 mas persona ku e elekshon anterior. Según Konseho Supremo Elektoral, no a entregá aproksimadamente 2200 karchi di vota na kranshi i ta atribuí esaki na pòstkantor ku pa vários motibu no a logra entregá tur karchi di votashon.
Un reportahe di Deya Mensche
Fiesta na sede di PAR. Pòrtrèt: Eva Vloon
‘Kampaña limpi’
Apesar di un kampaña elektoral plega ku hopi intriga i kontienda, tòg lider polítiko di PAR, Eugene Ruggenaath ta wak bèk ku gratitut i satisfakshon. “Nos a kore un kampaña limpi, kaminda e enfoke no tabata riba e indivíduo sino riba e partido”, el a splika na su sede na Fokkerweg. Seguidamente partidonan MFK i MAN kada un a saka sinku asiento, garantisando un kresementu pa ámbos respektivo partido.
Lider di MFK, Gerrit Schotte sigur ta satisfecho ku e resultado i a papia di un kampana kaminda nan no a disponé di fondonan pa hibá un kampaña ekstrabagante. “E delaster simannan nos a drenta e barionan i a pidi e pueblo pa hinka su konfiansa den nos i esei a proba di ta efektivo”, Schotte a splika.
Hensley Koeiman (meimei) Pòrtrèt: Deya Mensche
Hensley Koeiman di MAN tambe ta wak bèk ku satisfakshon riba e kampaña elektoral, ounke ku el a haña esaki poko kòrtiku. “Pueblo di Kòrsou a meresé mihó, paso no tabatin trankilidat, pa asina esaki ripará ku su gobernantenan ta traha p’e”, e lider di e partido blou a splika.
Bou di e votadónan ainda tabata reina hopi duda, i ora Ret Karibense a kòmbersá ku algun votadó na Kranshi, Stella Maris i Belafaas College, hopi no tabata sa ainda pa ken nan lo a depositá nan voto. “Ainda mi ta duda, pero lo mi wak esun ku a traha pa asina depositá mi sosten pe”, Kevin di 22 aña a splika.
Poko desorganisá
Judeline di 33 aña su parti ta bai vota pa un partido nobo, apesar ku e kampaña a bai un poko desorganisá. E manera ku e kampaña a bai a pone duda i kuestioná su voto, pero awor el a opta pa kambia esaki, mirando nan pensamentu i tur loke nan a logra durante e añanan anterior.