Pòrtrèt: Deya Mensche

WILLEMSTAD – Ayera anochi, un multitut grandi di siudadano rabiá a presentá dilanti e edifisio di Goisco pa un manifestashon pasífiko. Pueblo a hasi e yamada pa manifestá despues ku Joel da Silva Gois, propietario di Goisco, a menasá di hibá gobièrnu i MEO dilanti, despues di a ehersé vários kòntròl, entre otro riba karni i komestibel, den su establesimentu. Durante e kontrol akí a saka un kantidat grandi di karni, belèg i otro merkansia kaduká fo’i e supermerkado.

Un multitut di aproksimadamente mil persona a presentá ku pochi, panchi, pankarta i bandera pa ekspresá nan disgustu ku e situashon i e deklarashonnan inflamatorio di Gois den direkshon di gobièrnu i prensa. Gois tabata hopi emoshoná di a mira pueblo su malkontentu i na promé instante solamente kièr a enfrenta prensa.

Un reportahe di Deya Mensche

 

Despues di hopi gritu fo’i públiko pa e bin afó, Gois, kompañá pa organisadó Julius Koko, a enfrentá e públiko i a ekstendé su diskulpa. “Sòri, despensa i diskulpa pa kualke kos ku mi a inkomodá e pueblo”, e propietario a deklará. Tambe Gois a enfatisá ku e no ta kontra di niun kòntròl i ke pas ku e pueblo. E protestadónan a haña e diskulpa di Gois suàk, pasó mester a fòrsa e propietario pa enfrentá e públiko.

Siudadanonan ta protestá. Pòrtrèt: Deya Mensche

Apliká e leinan
Koko, na su banda, tabata satisfecho ku Gois su diskulpa, i a enfatisá ku mester apliká e leinan i sanshonnan ora esakinan keda violá. Koko a primintí di pone mes un preshon riba mandatarionan pa ehekutá esaki. No tabata klaro durante e protesta, ki medida adishonal Goisco ni e supermerkadonan lo tuma pa prevení ku karni of merkansia kaduká ta keda bendí na pueblo.

Parlamentario Charles Cooper tambe a haña e manifestashon un bon komienso i ta spera pa mira sanshonnan kontra di e violadónan. “No por tin kòntròl so, paso ainda e parti di sanshon ta keda atrás”, e mandatario a splika. Tambe ela primintí di preshoná gobièrnu pa sera e burakunan burokrátiko pa asina por apliká e leinan i protehá nos komunidat.
Sidney Provance, èks hefe di departamentu di labor i kònsùltent pa gobièrnu den tim multidisiplinario ku ta ehersé e kòntròlnan, ta satisfecho ku e multitut a sali pa nan derechonan.

Joel da Silva Gois. Pòrtrèt: Deya Mensche

‘No ta intimidá’
Reakshonando riba e reklamo di SUVECU kon e tim multidisiplinario ta funshoná, Provance ta di opinion ku e polisnan ta aktua korektamente i no ta intimidá niun hende. “Den e añanan ku mi ta forma parti di e tim, nunka mi no a mira niun funshonario papia malu ku hende. Niun kaminda na mundu bo por kana riba kaya sin identifikashon, pues kana ku esaki, i bo no tin niun problema”, Provance a enfatisá. Según Provance tin kòntròl diario, pero ta awó e tim tin dos aña ta funshoná, pues ela urgi pueblo pa duna espasio pa hasí esaki i mira e resultado.