WILLEMSTAD – Ta parse k’e heridanan di Bario di Koraal Specht, algun aña despues di e asesinato di e lider polítiko Helmin Wiels poko poko ta kurando i hubentut dje bario ke haña un chèns nobo. E morto di Helmin Wiels a laga un mancha grandi atras na Koraal Specht, pasobra algun di esnan te ainda envolví den e kaso, tin relashon estrecho ku e bario.
Sentro di Dama (SEDE) pa medio di algun proyekto ta dediká atenshon intensivo na habitante i prinsipalmente hóbennan di Koraal Specht, entre otro pa yuda saka e bario for dje buraku k’el a kai aden.
Dulce Koopman a traha e siguiente reportahe
Tambe den kuadro di Siman Internashonal di Famia, ku a selebrá siman pasá, i ku a klousurá djabièrnè último, SEDA tabata hopi aktivo na Koraal Specht. SEDA a klousurá Siman Internashonal di Famia ku un anochi di sine, riba un plenchi den kurason di Koraal Specht, ku el a adoptá. Prinsipalmente e hóbennan, a partisipá na e aktividat.
Desaroyá talent
Mirtha Leetz-Cijntje, presidente di SEDA a bisa tambe ku e ta konvensí ku tin futuro pa e hóbennan di Koraal Specht. “Nos mester desaroyá nan talentonan.” Ora ku e aktual proyekto terminá, ta kuminsá ku un proyekto kaminda mucha hòmber i muhé ta sigui un trayekto di enseñansa.
Susanita Mook, trahadó sosial den Koraal Specht, ta hopi satisfecho ku e motivashon di e hóbennan. “Mi no a ferwagt ku e proyekto di SEDA ta duna asina bon resultado. Atrobe por mira ku e proyektonan ta proba ku tin mester di yudansa i atenshon riba terenonan sosial i tambe emoshonal pa e hóbennan.”
Susanita Mook, trahado soshal. Pòrtrèt: Dulce Koopman
Desaroyo positivo di bario di Koraal Specht, no solamente ta bon pa e bario i e mayornan, pero tambe pa nos komunidat, Susanita Mook, ta sigui menshoná. “Ta p’esei komunidat kompleto mester duna un man pa yuda forma e muchanan.”
Eliminá e negativismo
Ounke ku tin indikashon ku e situashon ta mehorando na Koraal Specht, Susanita Mook no ke bisa nada ainda tokante posibel bahada di kriminalidat, miéntras no tin sifra ofisial.
E echo ku tin sierto sentensia den e kaso di asesinato di Helmin Wiels, ta kontribuí sinembargo na poko poko eliminá e negativismo ku ta kologá riba e bario di Koraal Specht.