Portrèt: RVD

WILLEMSTAD – Kòrsou tin un gobièrnu nobo ke men na Den Haag tin un representante polítiko nobo tambe. Awe el a tene su promé reunion ofishal ku e ministernan hulandes. Pero bon mirá ta kuantu poder e islanan karibense tin?

Historia ta siña nos ku e islanan no tin masha di bisa na Den Haag. Èks promé minister Gerrit Schotte a trata di evitá ku Hulanda lo a mete den elekshon. E promé minister arubano Mike Eman asta a tene un wèlga di hamber durante un disputa tokante un presupuesto. Sin resultado: Hulanda a intervení na mal òrdu riba tur dos e islanan.

Relashon personal ku minister
Segun èks minister di Reino Sheldry Osepa (MFK) e posishon di e islanan na Den Haag ta dependé di un bon relashon ku e polítikonan hulandes. “Konseho di Minister di Reino ta puramente un formalidat”, Osepa ta bisa. “E trabou ta sinta den e fase anterior. Espesialmente den e kasonan difísil, e relashon personal ku e ministernan i e ámtenarnan haltu ta hunga un papel enorme.”

Un hende ku no a kai na agrado na Den Haag ta e èks minister di Reino kurasoleño Marvelyne Wiels (2013-2016). Kontinuamente e tabata haña mal nòmber ku su supuesto froude di cv, intimidashonnan i mal maneho. Gobièrnu hulandes tabata konsiderá e sospechonan serio, espesialmente pasobra e mester a trata ku sekreto di estado.

Hulanda no tin e outoridat di duna un minister plenipotensiario su retiro. Tòg un reputashon asina sigur tin konsekuensha. “Un minister plenipotensiario asina Hulanda no ta tuma na serio mas”, segun Sheldry Osepa.

E islanan ta dependé di Hulanda
E dependensia di Hulanda ta sali durante e Konseho di Minister di Reino: un di e poko okashonnan ofishal kaminda polítiko hulandes ta reuní ku e representantenan di e islanan. Mayoria parti no sa tuma mas ku sinku minüt pa esaki.

“Tin bia ta un minister hulandes so bo tin mester pa sostené bo argumentonan”, Osepa ta konta. Por ehèmpel dia ku kasi tur minister hulandes tabata seka di bai di akuerdo ku un intervenshon na Kòrsou.”Mi ta kòrda ku tabatin un minister hulandes ku komo úniko a bisa: nò, laga nos duna Kòrsou un chèns. Esei a trese henter un kambio grandi.”

E ora ei e islanan kasi no tin influensha. Hulanda tin mas o ménos diesun minister den sala di Trèves kontra di solamente tres minister di Reino di e islanan. “E ora ei e úniko manera ku e islanan por sostené otro ta si nan forma un blòk huntu”, Roderick Pieters, èks minister di reino di Kòrsou pa PS (2013), ta bisa.

Kon lo para pa Anthony Begina (PAR), e minister di reino nobo pa Kòrsou? Segun e espektativa di e polítikonan na Den Haag, mihó ku e ministernan plenipotensiario di gobièrnunan anterior manera di MFK òf PS. E partidonan ei no tabata evitá konfrontashon den nan lucha pa ménos intervenshon di Hulanda.

“E gobièrnu nobo di Kòrsou no ta bai hasi pregunta krítiko tokante e relashonnan den Reino”, Sheldry Osepa, èks minister di Reino na nòmber di MFK di Gerrit Schotte, ta bisa. “Nan ta mas manera: Laga nos logra algu huntu, en bes di buska e límiténan.”