Pòrtrèt: Leoni Leidel-Schenk

WILLEMSTAD – Dia su amiga na estado tabata drumi den hòspital i tabata tin mester di remedi Eric Hoegee mes mester a bai en buska: “Mi mester a laga mi amiga atras i pasa na tur botika na Kòrsou. Na hòspital nan no tabatin e remedinan mas, tampoko na e botika di hòspital mes.” Regularmente famia i konosí mester yuda na Sehos.

Historianan tokante falta di material ya tin hopi aña kaba. E falta tin bia ta asina urgente ku temporariamente mester sera e salanan di operashon i por hasi operashon di emergensia so. E último bia tabata na mart di e aña aki, miéntras ku despues di un otro paramentu di operashon na ougùstùs di aña pasá a libra 7 mion florin pa start e asuntu atrobe. Esaki no a yuda masha segun e Asosiashon di Spesialista Médiko.

Na 2009 a hera di deklará Sehos fayit. Despues tur kos tabata trata di maneho finansiero. Pero despues di ocho aña ainda e hòspital ta sufri di défisitnan finansiero.

Pakiko e hòspital no ta logra di mantené su material na òrdu? Segun direktor médiko interino Frank Scheper e oumento di kuido i e seramentu di un otro instansha médiko, Klínika Taans, ta algun motibu pakiko e gastunan ta surpasá e bùdjèt di 120 mion. Su predesesor, èks direktor médiko Cai Winkel, espesialmente tabata mira e spesialistanan médiko komo ganadónan di masha hopi sèn ku mester a drenta den servisio di hòspital purá pa baha e gastunan. E spesialistanan médiko di nan parti ta mustra riba e mal maneho di Sehos i Sociale Verzekeringsbank (SVB).

Duna un man
Entretantu ta e pashèntnan ta sufri. “Mi tata tabatin algun siman den Sehos ku hopi kemadura den su kara. E ora ei mi mama a kumpra hopi ferbant, E stòk tabata masha chikí”, Bianca Hoedemaker ta konta. “Mi mama a hasié pasobra e sa ku hòspital no tin basta. Pero ainda ta un problema. Pa mi wela tambe nos mes a kumpra bruki pa hende grandi, pasobra nan no tabatin basta.”

Un heup nobo tampoko no tin tur ora, i e ora ei ta hinka e pashènt ku un solushon ménos bon. Fisioterapista Spaans: “Un pashènt di mi a kibra su hep i pa motibu di su edat tabata bini na remarke pa un hep nobo. Pero nan no tabata tin i a pone un konstrukshon ku skruf, e ‘dynamic hip screw’ ku no tin bon resultado den tèstnan. Esaki a kuminsá skùif i despues di dos luna mester a dun’é un hep nobo tòg.”

‘Strategia nobo’
E direktor general nobo Anthon Casperson i e Konseho di Maneho nobo mayan ta anunsiá nan ‘vishon i strategia pa reorganisashon’. Un vishon ku segun esnan ku ta konstruí e hòspital nobo (USONA/Berenschot) ta masha nesesario, pasobra kuido primariamente no ta trata di pieda, sino di kalidat.”Kisas e ora ei lo anunsiá e plannan tambe pa kombatí e falta di material.