WILLEMSTAD – Tradishonalmente Ret Karibense ta kòmbersá ku ministernan ku ta okupá un kartera pa promé biaha, pa asina konosé e mandatario i komprondé su vishon. Resientemente a entrevista Quincy Girigorie, e eskoho sorprendente di gabinete Rhuggenaath, komo minister di hustisia.
Na aña 2007, e hóben abogado di 37 aña, a kompletá su estudio di Lei Antiano na Universidat di Antias – awó University of Curaçao. Girigorie tin mas ku ocho aña ta praktiká lei general, ku énfasis riba konsiliashon i arbitrahe, inkluyendo derecho empresarial. Kiko ta bo vishon pa bo kartera?
Quincy Girigorie den kombersashon ku Deya Mensche
“Pa trese balansa den maneho di e kartera di hustisia, unda nos a titulá esaki komo ‘Dos man ta laba otro”, e minister a splika. Spesífikamente, Girigorie ke enfoká riba tres pilar, kual ta e parti preventivo, represivo i resosialisashon. Según e minister, durante su bishita introduktorio pa diferente departamentu den su kartera, e por a konstatá ku e delaster 15 añanan a neglishá e parti preventivo i resosialisashon severamente.
Minister quincy Girigorie. Pòrtrèt: Deya Mensche
Ban bario bèk
Tambe Girigorie a partisipá ku lo instalá 18 agente di bario, pa asina fortifiká e lasonan entre polis i habitantenan, unda lòs for di tareanan hudisial, nan lo fungi komo punto di kontakto ku pueblo. Girigorie lo kontinuá un trayekto di urgensia konkreto ku kuerpo polisial i a primintí ku pueblo lo mira un diferensia a korto plaso. “Mester hisa e nivel di funshonamentu di polis en general, ya ku kriminalidat a bira mas spesialisá, i awó e trabou ta rekerí mas abilidat investigativo”, e minister a splika.
Ya e tabatin vários kòmbersashon ku sindikatonan i mando polisial, kende a indiká ku nan mester di ayudo. Girigorie a pidi nan pa entrega un proposishon spesífiko pa e komprondé kua área mester reforsamentu urgente. “Lo mi no buska yudansa sin konsulta ku tur partner stratégiko”, Girigorie a enfatisá. Girigorie a partisipá ku ya a instalá 60 kámara riba lugánan stratégiko riba nos isla, pero e meta ta pa introdusí 150 kámara e aña akí. Esaki ta fasilitá e solushonámentu di krímen ku informashon teknológiko.
E situashon alarmante di reclassering i prizòn tambe tin atenshon di Girigorie. E tabatin kòmbersashonnan ekstenso ku e respektivo direktornan pa reintrodusí programanan di resosialisashon i entrenamentu ku e delaster añanan a muri un morto natural.
Despues ku Girigorie a deklará ku e ke protehá nos kosta mas mihó kontra e ola di refugiado fo’i Venezuela, e ta kontentu ku porfin a kuminsá un kombershon riba e situashon alarmante. Pa basta tempu e tres islanan ta halando atenshon di Hulanda i reino, ya ku esaki su reakshon ta poko pasivo riba un posibel resolushon. Según e minister, e konsekuensia di su deklarashonnan ta ku gobièrnu Hulandes a indiká ku nan lo bai formula un posishon ofisial di reino pa ku e situashon akí.