WILLEMSTAD – E rumannan ohochi di 21 aña Xiarysse i Shanysse Emerenciana di Kòrsou ta bon den sòftbòl. Asina bon asta, ku nan a haña un beka pa bai hasi nan deporte i studia. Xiarysse: “Ta un soño ta sali.”
Xiarysse i Shanysse e luna aki a bini kas serka nan mayornan pa regla e papelnan pa nan beka di estudio. “Ta hopi great pa ta bèk na Kòrsou”, Shanysse ta bisa. “Kontínuamente hende ku topa nos ta bisa ku nan ta orguyoso di nos.”
I no ta straño, pasobra tur kos ta bai bon pa e hende muhénan hóben aki: nan ta atkirí beka tras di beka. Resientemente nan a haña un ku nan por studia i hunga sòftbòl kuné e dos añanan binidero na Florida Institute of Technology na Melbourne.
Shanysse i Xiarysse. Potrèt Eva Vloon
Amor na promé bista
E dos rumannan a kuminsá ku sòftbòl tempu ku nan tabatin sinku aña so, despues ku nan a kore pasa ku nan tata banda di e vèlt di deporte Pichingolo na Buena Vista. Ei nan a mira e hungadónan di sòftbòl ta train. Tabata amor na promé bista. “M’a bisa mi tata: e deporte ei mi ke purba hasi”, Xiarysse ta kòrda. “Mésora nos a papia ku e coach, Shanysse ta añadí. “Esei a puntra ku nos ke bin hunga e siguiente dia. Nos a hasi esaki i asina e kos a kuminsá.”
I pronto a resultá ku e muchanan ta bon den deporte. Ku nan diesshete aña nan a haña nan promé beka di estudio i nan a bai Florida pa hunga ei i kaba nan skol sekundario.
Traha duru i talento
Awor nan tin kuater aña ta biba na Florida. Resientemente nan a haña un beka ku por laga nan sigui hunga sigur dos aña. Aktualmente nan ta hunga pa e tim di Palm Beach State College, kaminda nan ta bai skol tambe.
Tata Silvio ta masha orguyoso di su yu muhénan: “Nos ta un famia kurasoleño normal, nada riku”, e ta splika. “Tur loke nan a logra ta e resultado di traha duru i talento.”
Xiarysse den akshon
Soño nobo
“Semper tabata mi soño di biba na Merka”, Xiarysse ta konta. Shanysse ta dun’é rason: “Bo mester traha duru, pasobra ku talento so bo no ta bini kla. Pero ta bale la pena 100 porshento.”
Djis pasobra nan promé soño a sali no ke men ku awor nan ta bai sosegá. Xiarysse: “Mi siguiente soño ta pa por hunga sòftbòl na Merka na un nivel profeshonal, por ehèmpel serka USSSA Pride.”
Shanysse ta mira su futuro den desaroyo di fasilidat di deporte pa mucha. “Lo mi ke hasi posibel pa otro mucha, por ehèmpel na Kòrsou, haña e mésun oportunidat manera nos pa nan soño sali.”