Pòrtrèt: Sharina Henriquez

ORANJESTAD – Djárason a dera Tino Ruiz ku hopi honor na Aruba. E brigadir di 32 aña di edat siman pasá a fayesé ora e tabata hasiendo su trabou.Un hòmber a dal e mata ku un blòki di piedra.

E hòmber di 40 aña di edat aki tabatin problema mental. Un kolega di Ruiz a tir’e mata. E morto di e polis ta un shòk grandi pa e kuerpo, asina komisario Dolf Richardson ta bisa. “For di tempu ku e Kuerpo di Polis Aruba ta eksistí nunka nos no a pèrdè un kolega in the line of duty di e manera aki. E koleganan ta kompletamente perturbá.”

Tabatin representante di polis for di Kòrsou, Boneiru i Sint Maarten ku a bini pa e entiero. Kant’i kaminda no tabatin hopi públiko, pero si e personal kompleto di botika Santa Anna. “E tabata pashènt serka nos. Ta teribel loke a pasa. Pa haña bo ta dera un hende di e manera aki”, un trahadó ta bisa.

Sin sosten
Djis un poko mas leu un èks wardadó di prezu di CEA (Cuerpo Especial Arubano) ta sinta mira e kola di entiero. “Hende ku problema mental, bo no por hasi nada kontra esaki. Aki na Aruba, pa ta honesto, no tin un bon lugá di akohida pa nan. Ta atmití nan i ta saka nan bèk atrobe pone nan riba kaya.” E ta haña ku gobièrnu mester buska un solushon pasobra e problema ta bira mas i mas grandi so, ku problema di droga i famia. “Espesialmente bou di hóbennan.”

Hefe di kuerpo Richardson ta laga sa ku ta investigá e kaso i ku lo evaluá e susesonan ku tabatin promé. “E (e kulpabel) tabata konosí serka nos, pero semper tur kos a bai bon. Pero un bia e kos a bai malu. Esei ta hasi nos trabou kompliká i difísil.”

Richardson ta sigui: “Awor ta na e departamento di Training Integral di Trabou pa opservá kiko nos por siña di esaki komo kuerpo.”