Pòrtrèt: Deya Mensche

WILLEMSTAD – E resultadonan di èksamen di e aña di skol 2016-2017 na Kòrsou ta mihó ku a ferwagt, mirando e adaptashonnan ku a introdusí na yanüari 2016 na e diploma di havo/vwo. Asina e direktivanan di skol lokal ta haña. Na 2014 e minister hulandes Jet Bussemaker a palabrá ku Kòrsou ku na 2016 i 2017 lo hasi e diploma nan igual na e nivel hulandes.

E adaptashonnan aki ta nifiká ku aworakí un alumno mester tin un promedio di 5.5 pa su èksamen general ku solamente un 5 pa un di e tres materianan prinsipal, esta ingles, hulandes i matemátika. Mas o ménos 81 porshento di e kandidatonan di vwo i 64 porshento di e kandidatonan di havo a slag e aña di skol aki. Esaki ta e resultado provishonal despues di e hèrèksamennan.

Un reportahe di Deya Mensche

“Si bo wak e sifranan di último añanan, bo no ta mira mas ku algun porshento di diferensha”, Lisette Van Lamoen-Garmers, direktor di e Fundashon RK Schoolbestuur, esun di mas grandi na Kòrsou, ta bisa.

Esther Padilla – Bomberg, hefe di ETE.

Di tres adaptashon
Pero mester introdusí un di tres adaptashon ainda, esta e tèst básiko di aritmétika pa havo, vwo i kisas vsbo. Esther Padilla-Bomberg, kabes di ETE, e sentro di ekspertisa pa èksámen di ministerio di Enseñansa: “e tèst ta midi e konosementu básiko di aritmétika, ku mester keda na nivel, komo ku den kurso di tempu esaki por bai atras hopi”, e ta splika. Padilla-Bomberg ta bisa ku e adaptashon ku a añadí ainda mester registr’é den lei, pero e ta premirá ku lo introdusí esaki ofishalmente aki dos aña.

“Durante mi kòmbersashonnan ku e direktivanan di skol, a sali na kla ku e porsentahe di esnan ku a slag no a bai atras” Padilla-Bomberg ta bisa. “Un bon resultado final ta basá riba henter bo trayekto di skol i no solamente un resultado di èksamen final.”, e ta enfatisá. Van Lamoen-Garmers ta añadí: “e adaptashonnan tin un influensha positivo riba e nivel di enseñansa, ku e garantia riba un mihó konekshon ku e enseñansa universitario na Hulanda i otro pais.”

Errol Cova den kombersashon ku dosentenan. Potrèt: Fundashon KPEK

‘Dosente ta protagonista’
Padilla-Bomberg ta rekonosé si ku e último añanan e resultadonan di e èksamen di havo no tabata optimal i ku mester bini un plan pa mehorá esaki. Segun Errol Cova, presidente di e Fundashon KPEK – ku ta dirigí riba desaroyo di enseñansa – e nivel d enseñansa fundamentalmente ta dependé di e dosente. “E dosente ta e protagonista prinsipal ku ta fomentá, mantené i desaroyá e kalidat di nos enseñansa”, Cova ta haña. “Meskos ku e pasamentu di e kondishonnan mas severo pa e diploma havo/vwo pa e alumno.”