Portrèt: Gijs van den Heuvel

KRALENDIJK – Minister Ronald Plasterk di Relashonnan den Reino ta haña e kantidat di kambio den gobièrnu di Boneiru un prekupashon. E falta di kontinuidat ta nifiká ku lo no bini un laso di konfiansa ku e ministerionan i Den Haag, asina el a bisa na su bishita di despedida na e isla. “E kambionan masha rápido mes, ku hende nobo kada seis luna, no ta fasilitá e koperashon.

Lista di kos di hasi

Diputado Nina den Heyer ku djamars mester a entregá su retiro, entretantu a siña ta kon e kos ta bai, segun palabranan di Plasterk. “El a dunami un lista di tópiko ku mester trese dilanti na e ministerionan. Asina e sistema ta traha. Esnan ku ta pará meimei den e situashon lokal si sa di haña e kaminda pa gobièrnu na Den Haag.

Progreso

E minister gustosamente a enfatisá e progreso di e último añanan. “Dies aña pasá mi a yega Boneiru komo minister di Enseñansa i mi a bishitá e skolnan. Nan no tabata masha bon pará i awor tin skol moderno i bunita. Esaki ta konta tambe pa kuido i hopi otro tópiko. Pero falta hopi ainda, nos no ta kla.”

Durante e último kambionan di koalishon na Boneiru integridat a hunga un papel importante. E minister no ke ta spesífiko den esaki. E ta papia algun palabra general si: “Si bo kuminsá kada debate polítiko ku un diskushon tokante integridat di e otro persona bo no ta bin kla. Naturalmente integridat ta masha importante, pero lo ta bon tambe pa diskutí tokante e diferenshanan di opinion polítiko i papia tokante kontenido. E diskushon tokante integridat no mester bira un instrumento polítiko.” Plasterk a enfatisá ku integridat ta e kuminsamentu di bon gobernashon. “Bo mester sirbi e interes general i no bo interesnan personal.”

Manifestashon

A probechá di e bishita di Plasterk pa tene un manifestashon di bonerianu malkontentu. Tabatin tiki hende, mas o ménos 100. Polis a konsehá Plasterk pa no sali pa risibí un petishon. “E ker a sali bini si, pero nos mes hendenan a par’é”, Nochi Willem, lider di e akshon, a bisa e demonstrantenan.

Minister Plasterk ta puntra gezaghebber Rijna si e por sali pafó. Ta konseh’é pa no sali

Lider di akshon Nochi Willem ta desapuntá ku e minister no ta bin tuma e petishon

Pobresa

Na Boneiru añanan largu kaba ta mustra riba Hulanda ora ta trata di pobresa, pero tambe ta tene Den Haag responsabel pa e kamindanan malu. Nunka e plaka ku a primintí no a yega, e mandatarionan ta bisa. No ta bèrdat, segun Plasterk. “Tres aña pasá nos a pone 9 mion disponibel. Simplemente nada no ta sosodé.” Aparentemente un Kolegio Ehekutivo anterior a asigná e plaka pa mehorá e haf. “Esaki por ta un desishon legítimo”, segun e mandatario. “Pero e ora ei bo no mester bisa ku Hulanda no a duna plaka pa drecha e kamindanan. E plannan tei i lo ta bon pa kuminsá traha ku nan. A pone e medionan ei disponibel pa hasi esaki.”