WILLEMSTAD – Prokurador-general Guus Schram algun dia promé ku e bai Hulanda bek – su tempu di servisio a kaba – a anunsiá un enfoke mas fuerte di korupshon i froude den e gremionan sosial haltu di komunidat. Bou di su maneho esaki a kuminsá kana bon, asina e ta bisa den un entrevista.
“Sea ku ta Schotte òf Tromp, nos ta tuma e kaso i nos ta trata di hasi algu kuné. Si nos hiba un kaso dilanti, e ta asina bon prepará ku nos ta sali for di e punto di bista ku na final e lo yega na un kondena.”
“Tantu na Kòrsou komo na Sint Maarten i Boneiru a arestá polítiko, miembro di Staten, èks minister, un promé minister, hende ku ta traha na imigrashon i direktor di banko, i ku éksito nos a persiguí nan i kondená nan.”
“Ora nos entamá un kaso korupto, nos no ta wak solamente e persekushon, sino huntu ku e minister responsabel òf e organisashon konserní nos ta kuminsá traha ku e pregunta: kiko boso ta bai hasi pa esaki no sosodé mas?”
“Tin un deseo mas grandi pa hasi algu ku tres aña i mei pasá. Por ehèmpel awor mi ta mira kabesnan di servisio serka mi na mesa ku ta trese un problema serka mi. E asuntunan na Wardakosta i e Organisashon di Atmishon ta bon ehèmpel di esaki.”
Tim di kita sèn
Ademas a kaba un tèst eksitoso ku kitamentu di sèn òf kos ku a optené ku froude.
“E tim di kita sèn òf kos na promé instansha tabata ei pa un aña. Nos mester a mustra ku tabatin un business case: loke a invertí, ora di kita e mester sali bèk kompletamente.” Esaki a logra bon. Na petishon di e ministernan di Hustisia a prolongá e proyekto. Schram ta kere ku su susesor Roger Bos, ku ta kuminsá traha djabièrnè awor, lo skohe pa proponé na e ministernan pa e tim di kita dupliká. “E ora ei e tim ta hopi mas grandi i ménos vulnerabel. Asina mas i mas nos ta bai den un direkshon struktural”, segun Schram.
Informashon
Schram a entregá un dokumento di maneho ku lo duna direkshon e sinku añanan binidero na e trabou di OM i e kadena hudisial. Den e dokumento e aksèntnan ta riba un integrashon mas grandi di públiko i e trabou di hustisia, mihó atkisishon di informashon i pa haña mihó kòntròl riba e fronteranan.
Schram: “Nos ke sa kiko ta drenta òf sali na hende, droga, arma òf fluho di plaka. Pa un gran parti ainda nos no tin un idea. For di Trinidad djihadista a sali pa di Siria. Sin duda un parti di nan lo a bula via Kòrsou òf Sint Maarten. Tur e kosnan ei nos ke sa mihó di nan.”
“Si bo ke konstruí un mantenshon di lei ku por hèndel kriminalidat i si bo mester skohe den kiko bo ta bai invertí, bo mester hasi esaki na e banda di informashon i bo mester haña dominio di bo fronteranan.