HILVERSUM – Krus Kòrá na Hulanda ta habri giro 5152 pa ayudo di ousilio despues di e orkan destruktivo Irma. E orkan a afektá e partinan karibense di Reino i otro islanan masha pisá. “Ayudo rápido ta di importansha krusial.”
Asta e edifisionan di mas fuerte na e parti franses di Sint Maarten no a wanta orkan Irma, e minister franses di asuntunan interior Gérard Collomb ta bisa medionan di komunikashon franses. Ta trata di edifisio manera warda prinsipal di polis i un kazèrne.
E komunikashonnan di telefon na Sint Maarten, Saba i Sint Eustatius a kai afó. Redakshon di NTR/Ret Karibense via Hulanda i otro isla enbano ta trata di haña kontakto ku nos koresponsalnan i otro habitante.
Krus Kòrá ta kuminsá kolektá plaka
E plaka ku a kolektá na Hulanda ta pa ayudo médiko, kuminda i lugá di akohida pa e islanan karibense, entre nan Sint Maarten, Saba i Sint Eustatius. Segun e promé baluashon e daño ta kore den miónes.
“E dianan binidero lo bira difísil pa duna ousilio, ta ferwagt hopi áwaseru i p’esei tin un chèns grandi riba avalancha di tera. Ademas pa e siman binidero a pronostiká un tempestat tropikal mas”, Marion van der Reijden di Krus Kòrá hulandes ta bisa.
Seguridat
E organisashon di ousilio a habri un chèk di seguridat pa Sint Maarten, Saba i Sint Eustatius. Via www.ikbenveilig.nl habitantenan por laga sa ku nan ta seif. Asina famia i amigu ku informashon personal spesífiko por chèk si un hende ta seif.Ta promé bia ku ta usa e website aki durante un kalamidat na e partinan karibense di Reino.