PHILIPSBURG – Na Sint Maarten tur hende ta buska awa. Shafùr di taksi Anne Marie ku hopi esfuerso a buska su kaminda den e kayanan destruí pa e hiba un grupo di turista franses aeropuerto. Awor e ta bai kore rònt un dia largu ku dos tim di kámara hulandes ku a yega ku un Hercules di forsanan aéreo, den e miseria ku orkan Irma a kousa. Bou di u kondishon si: nan mester yud’é haña awa di bebe.
Outor Jean Mentens
Alita Singh ta periodista na e korant lokal The Daily Herald. E ta bin reportá yegada di Rei Willem-Alexander pa su korant. E ta konta kon un siman despues di e orkan ainda tin un situashon kaótiko ta reina; “Prome minister mester a yama su gabinete huntu via transmishon di e úniko stashon di radio ku tin den airu ainda, pasobra komunikashon telefóniko tin masha poko.”
Rei Willem-Alexander na Sint Maarten. Potrèt Jean Mentens
No tin korant
E ta konta ku no por drùk korant pasobra no tin awa pa meskla e enk kuné. “Pero nos no por pensa riba distribushon tampoko, ke men ta edishon online so nos ta saka.”
Anne Marie ta buska su kaminda den kayanan di Philipsburg kaminda yen di kos kibrá ta haltu haltu bentá riba asfalt. Tin un hanchi di pasa di nèt nèt hanchura di un outo. Na un skina den Philipsburg ta parti awa di bebe. Tin hopi pleitamentu pushamentu i halamentu. “Tur hende ta yega na bùrt”, un hòmber riba un trùk ku tanki ta grita, i pa pone òrdu e ta sera e kranchi.
Cynthia Scott ta para wak loke ta pasando. E ta ku fakansi serka famia i e ker a bai Hulanda bèk 8 di sèptèmber. E no tabata sa ku hende ku un pasaporte hulandes i bibá na Hulanda por mèldu pa evakuashon. E tin miedu di bai aeropuerto: “MI no ke drumi ei den airu liber.”
Loke a sobra di e aeropuerto ku tabata asina bunita ta birando e úniko lugá kaminda poko poko ta surgi un struktura. Artíkulo di ayudo ta yega i ta surti nan pa parti. Marinir hulandes ta manehá e operashon ku un firmesa manera di heru.
Serka e úniko entrada i salida improvisá di e aeropuerto entretantu sentenar di pasahero pegá a bin sinta. Nan ta trata mas tantu ku nan por pa protehá nan mes kontra solo ku parasòl kolorido. Tin grupito britániko, hende di Repúblika Dominicana, merikanu pero e únikonan ku te awor tin un chèns di sali ta hende ku pasaporte hulandes òf franses.