Portrèt: Ajay Rawtani

WILLEMSTAD – E habitantenan di Sint Maarten ta sigui sinti e efektonan di orkan Irma i mayoria parti di e isla ainda ta den estado di emergensia. E infrastruktura di e isla ta afektá severamente i hopi kaminda ainda mester drecha e suministrashon di awa i koriente.

Doñonan di empresa di Sint Maarten poko poko ta realisá e magnitut i e seriedat di e daño material na edifisio i infrastruktura, i gobièrnu ta kuminsá lanta tim di limpiesa i rekonstrukshon pa solushoná e situashon. E komunidat komersial espesialmente a lamentá e daño adishonal na man di sakeadó i gobièrnu a hura di persiguí tur delinkuente asina e situashon normalisá.


Outor Deya Mensche

Ret Karibense a papia ku Ajay Rawtani, IT i Operation Manager di Divico Distributors na Cole Bay, Sint Maarten, ku a ekspresá su inkredulidat pa e situashon. “Mi por komprondé te na sierto altura e nesesidat pa awa i kuminda despues di un katástrofe asina, pero kon ta hustifiká e kibramentu den pakus di aparato elektróniko i otro empresa no di kuminda i hisa sistema di muzik i televishon flatscreen bai kuné?”, Rawtani ta puntra.

“E infrastruktura di e isla a bai atras pa dékada. Kiko nan ta bai mira riba e televishon ku nan a bai kuné. No tin koriente, no tin komunikashon, sin awa, sin dak riba nan kabes? Ainda mi no por kaba di komprondé”, e ta kontinuá.

Antonio Gosilio, doño di Incredible Nutrition & More na Simpson Bay, tambe ta ekspresá su inkredulidat. “Nos mester di mas polis i presensia militar pa normalisá e situashon. Ounke tin toke de keda for di 5 or di atardi ainda hende tin miedu den nan kas den skur. Despues di un siman e situashon a bira asina pèrtá pa sierto hende ku nan ta sali anochi pa bai mira kiko nan por haña di kos ku nan tin mester di dje.”

Neil Henderson, doño di Henderson International, un kompania grandi di seguro, ta traha nonstop pa prosesá tur e petishonnan ku su kompania a haña for di ora ku orkan Irma a destruí e isla. E ta kalkulá ku e daño material ta entre 2 pa 3 bion florin. Segun Henderson e promé prioridat ta pa limpia e restunan di demolishon i e awanan manera lagun partikularmente, pa evitá problema di higiena i problema físiko pa e siudadanonan. Klientenan di e kompanianan di seguro mester saka potrèt di nan propiedat promé ku nan limpia e restunan di demolishon pa evitá disputa tokante nan pèrdida.

Henderson ta indiká tambe ku Sint Maarten su ekonomia i su empleo tabata bou di preshon basta tempu kaba i e tin miedu ku hopi hende no por a paga e primanan di seguro i no ta sigurá. “Pèrdidanan no sigurá lo bira un problema grandi pasobra mayoria di e kasnan no por biba aden mas i esaki lo ta un reto pa nos trankilidat sosial”, e ta konkluí.