PHILIPSBURG- Eveline Henriquez ta lucha ku un problema moral grandi: e mester laga evakuá su yunan si òf nò? “Esun mayó ta basta grandi ku mi por lag’é bai serka famia na Hulanda,” e ta bisa, “pero esun di mas jòn nò i mi no ke parti nan for di otro tampoko.”
Eveline ta manager di un agensia di nutrishon i sa mihó ku kualke hende ku kuminda normal lo no tin na mesa dje lihé ei. Si mester manda e muchanan afó, lo e preferá pa nan bai Kòrsou òf un otro isla den serkania, “pasobra si nan bai ta pa un tempu mas largu i e ora ei Hulanda ta masha leu.”
Pregunta krusial
E pregunta kiko ta mihó pa mucha menor di edat ta penoso pa mayornan i e kontesta ta masha nesesario pasobra e notisia – no konfirmá – ta kore ku Krus Kòrá ta ofresé di evakuá mucha pa Hulanda un di e dianan aki.
Richard Gibson Jr., yu hòmber di e minister di Finansa, tampoko no sa kiko e mester hasi. “Mi ta komprondé ku mayornan ta haña e situashon aktual masha peligroso i mésora ke duna atenshon na e daño ku tin. Kisas e ora ei e muchanan ta stroba so.
E situashon ta asina peligroso ku realmente tur hende ku tin yu chikí ta kore rònt ku nan den outo i sigur no ta laga nan keda kas.
Skolnan ta será
Skolnan tur ta será, hopi bia nan tin hopi daño i e direktivanan di skol awe numa ta reuní pa promé bia pa balotá e situashon. “Wela i tawela por hèndel dos mucha?” Richard ta puntra su mes. Loke e ta preferá mas tantu ta di tene nan serka dje.
Es ku no tabatin niun problema di manda su yunan afó mésora ta Franco Guadeloupe, rèktòr di ‘University of St. Martin’. Orkan Irma a bai ku su kas kompletamente i e ta kore rònt den un outo sin bentana i winshil. “Un ora mi ta drumi serka amigu, otro ora otro kaminda, nunka mi no sa delanta; esei no por ora tin yu”, e ta bisa. E edifisio di universidat el a habri komo shèlter i e ta pèrkura pa e suministrashon di ayudo di emergensia i awa.