Pòrtrèt: Facebook/Jolanda Strik

KRALENDIJK – Seguridat den tráfiko na Boneiru ta kore peliger pa motibu di e kantidat di buraku ku tin den e kamindanan. Diputado James Kroon di Tráfiko i Transportashon ta ‘kompletamente di akuerdo’ ku e demonstrantenan ku poko tempu ei a tene un akshon lúdiko ora nan a hinka flor den e burakunan den kaya. E ta pensa ku otro aña e por trata e trabou di mantenshon di kaminda hopi serio.

Na Boneiru ta keha añanan largu kaba tokante e kamindanan ku ta bai atras mas i mas. “Mi ta sostené nan protesta”, Kroon ta bisa tokante e akshon di flor. “Protesta lúdiko òf laga, e hendenan tin derechi di ekspresá nan opinion i protestá kontra e estado malu di e kamindanan. Ta asina si ku e kamindanan na Boneiru ta histórikamente den mal kondishon.”

‘Mester di hopi plaka’
For di 10-10-10 – tempu ku Boneiru a bira un munisipio ekstraordinario di Hulanda – e responsabilidat pa strukturalmente drecha e kamindanan ta di gobièrnu lokal, pero mester di yudansa hulandes si.Pasobra mester di hopi plaka i esei e isla no tin. “Awor ku Boneiru ta forma parti di Hulanda, gobièrnu mester haña e oportunidat pa strukturalmente drecha e kamindanan”, segun e diputado.

James Kroon

Añanan kaba ta papia sin resultado tokante un kontribushon di Gobièrnu di Reino ku e Kolegionan Ehekutivo konsekutivo i Hulanda. Kroon ta optimista i ta pensa ku aworakí si lo bini un akuerdo. “Nos tin un plan pa drechamentu struktural di e kamindanan i konstrukshon di kayanan nobo di piedra. Te aworakí Hulanda no tabata dispuesto pa traha seriamente na un proposishon finansiero alkansabel pa ehekutá e plan. Nos komo Boneiru mester tin nos finansanan na òrdu pa yega na un akuerdo ku Hulanda. Mi mes ta kere ku entre awor i febrüari nos mester tin un akuerdo ku Gobièrnu di Reino.”

Partimentu di plaka
E diputado ke rektifiká e ponensia di èks minister Ronald Plasterk di Relashonnan den Reino, ku tabatin 9 mion euro disponibel pa infrastruktura, entre otro e kamindanan. Segun Plasterk Boneiru a usa e plaka ei pa e haf i e aeropuerto. “Esei no ta korekto. Gabinete Rutte a pone mas o ménos 14 mion euro disponibel pa infrastruktura: Mas o ménos 9 mion pa e pirnan i mas o ménos 4 mion pa proyektonan sosial den barionan.”

Plasterk ker a usa e 4 mion ei pa kamindanan den besindario di skol. Ounke aksesibilidat di skol ta kai bou di responsabilidat hulandes, e Kolegio Ehekutivo di Boneiru di e tempu ei a tuma aden i bai di akuerdo.

Kombersashonnan ku Den Haag
“Gabinete Rutte II (ku Plasterk tabata forma parti di dje) nunka no a pone plaka disponibel pa strukturalmente konstruí kaminda di piedra òf drechamentu di kamindanan na Boneiru.” Ainda e Kolegio Ehekutivo aktual ta hiba palabrashon tokante di esaki, entretantu ku Rutte III. “Nos ta optimista i pronto nos lo bolbe entregá un plan na Hulanda pa logra haña e finansanan. Ta di tres bia, nos ta ferwagt ku awor si nos lo logra.”