SCHIPHOL – A surgi imágen nobo di e aresto fatal di Mitch Henriquez, ku fiskal den su mes palabranan a bisa ku e ‘no tabata sa di nan’. Ta trata di imágennan original. Kontrali na e imágennan ku OM a haña di reshèrshi di Reino e imágennan original aki segun abogado Richard Korver si ta kla i por tende bon kiko ta papia.

Despues di lunanan di posponementu djaluna meinta a kontinuá e kaso penal kontra e dos polisnan ku tabata envolví den e morto di Mitch Henriquez (42) di Aruba. Esaki a sosodé den un korte di seguridat máksimo na Schiphol.

E imágennan original ku a surgi djaluna den korte e famianan di Mitch Henriquez a haña di un ofisina di detèktif privá. Segun nan abogado Korver riba e imágennan aki ‘por mira bon kon Henriquez su kara ta bira püs durante di e detenshon’ i ku ‘e polisnan ta wak otro spantá.

Problema serka reshèrshi di Reino
Kon por ta ku reshèrshi di Reino no tin e imágennan aki ta e pregunta. Segun Korver esaki ta trese un problema na kla’. “Reshèrshi di Reino a traha un kompilashon malu di imágen ku opviamente no ta sirbi.” E abogado ta bisa ku e por entregá e imágennan djaluna ainda komo dokumento di e proseso. E ke pa OM investigá e zonidu i imágennan original mas aleu.

Korte a duna Kòrver pèrmit pa entregá e imágennan komo parti di e proseso, pero a disidí di no wanta e kaso pa esaki.

Sentensia den un siman
E arubano Mitch Henriquez (42) a muri na 2015 despues ku na e Parkpopfestival na Den Haag sinku polis a deten’é ku hopi violensia. Anteriormente Henriquez a grita ku e tin un arma.

OM a disidí di persiguí dos di e sinku polisnan. Nan ta parse dilanti wes pa maltrato grave ku morto komo konsekuensha. Pero por sentensia e polisnan mas pisa tambe pa homisidio. E espektativa ta ku wes lo sentensiá dia 30 di novèmber.