ORANJESTAD – For di e material di vidio nobo ku e famianan di Mitch Henriquez a presentá na korte na Schiphol, lo a sali ku e polisnan envolví tabata sa ku e no tabatin un arma. Asina e èks miembro di Staten Desiree De Sousa-Croes di Aruba, ku a biaha pa Hulanda pa e kaso, ta bisa. “Tabata nan intenshon pa lag’é sinti doló.”

OM den su eksigensia anteriormente e siman aki a indiká ku no mester sigui kastigá e dos polisnan sospechoso. Promé minister arubano Evelyn Wever-Croes ta yama e eksigensia ‘penoso’.

Kastigá
De Sousa- Croes siman pasá a presensiá e trato di e kaso huntu ku e famianan. “Djaweps mi a sali for di e sala ku e famianan despues ku nan a kanselá nan konfiansa den e proseso hudisial.”Segun e for di e material nobo di potrèt i vidio – ku no a hasi públiko – tabata e intenshon di e polisnan pa kastigá Henriquez mésora pa su komportashon.

“Bo ta tende un polis bisa kla: ‘Stòp di hasi wega ku bo tin un arma’. Pa nan tabata kla ku Mitch a hasi wega.” De Sousa-Croes ta bisa ku e ta haña remarkabel ku no a listra Mitch promé. “Si un hende bisa ku nan tin un arma, ta parse mi ku ta esei ta promé kos ku bo ta hasi.”

A ninga fail nobo
De Sousa-Croes ta bisa ku abogado Richard Kòrver, ku ta representá e ruman muhé i e mama di Mitch Henriquez, a pidi si awe e por a entregá un fail médiko nobo. “Wes a ninga esaki. Nan ta haña ku entretantu a buska sufisiente bèrdat.”

Kuminsamentu di e siman aki e fiskal a divulgá ku no ta eksihí kastigu. No opstante ku segun OM a prueba ku Henriquez a muri pa motibu di violensia ekstremo di parti di polis. Segun OM e polisnan a haña basta kastigu kaba pa e impakto grandi di e kaso i nan doño di trabou a reprendé nan.

‘Herida hundu’
Promé minister Wever-Croes ta bisa ku e deklarashonnan di e testigunan den e kaso a habri heridanan grandi. “Ta un kaso sumamente doloroso i meskos ku e mayoria grandi di siudadano mi ta sorprendí ku no ta eksihí kastigu, ounke a prueba maltrato. Esaki ta duna un smak malu.” Wever-Croes ta bisa ku e ta warda e sentensia di hustisia ku hopi interes.

E arubano Mitch Henriquez (42) a fayesé na 2015 despues ku na e festival di Parkpop na Den Haag sinku polis a arest’é na un manera hopi brutu. Anteriormente Henriquez a grita ku e tin un arma.