Portrèt: Ronald A. Muyden

KRALENDIJK – James Finies, presidente di e fundashon boneriano pa mas outonomia, na 2018 ta bini ku un plan pa un di dos bishita na Nashonnan Uní (NU).

E idea ta ku tur isla ku ta den un situashon manera esun di Boneiru – no solamente isla di Antia anterior – ta djòin. “Pa nos move huntu den unidat. E bia aki nos no ta bai nos so”, Finies ta bisa resolutamente.

E fundashon di Finies, Nos Ke Boneiru Bèk (NKBB) e wikènt ku a pasa a organisá si di dos simposio pro-outonomia. E simposio a trese organisashonnan i spesialistanan di diferente isla karibense huntu. Na total diesdos persona a duna e presentenan un bista kon outonomia ta mustra na nan isla. Nan tabata bini entre otro di Puerto Rico, Islanan San Andres, Kòrsou, US Virgin Islands i Aruba.

Denicio Bryson Potrèt: Ronald A. Muyden

Moises di Antia
Un di e papiadónan, Denicio Bryson di Sint Maarten, den su spich a yama e polítiko kontroversial di Sint Eustatius Clyde van Putten, e ‘Moises di Antia’. E eksperto hurídiko ta sita ku Konseho Insular di Sint Eustatius na luna di mei ku un moshon a supliká nan mandatarionan urgentemente pa no kumpli mas ku leinan hulandes, si esakinan ta bai kontra e reglanan di NU. Sint Eustatius, meskos ku Boneiru, for di 10 di òktober di 2010 ta un munisipio ekstraordinario di Hulanda.

“Niun isla antiano no a riska esaki”, segun Bryson. “Sint Eustatius ku e akshon aki ta basa su mes riba e Lei i Derechonan di mas haltu di Statüt; e Pakto di Nashonnan Uní. Artíkulo 103 ta bisa ku si kualke tratado – Statüt ta un tratado – ta den konflikto ku e debernan di e Pakto, ta e Pakto lo triunfá.”

Miéntras ku Finies ke hiba un lucha polítiko tambe, den su mes palabranan e ta ‘polítikamente enfermo’. E motibu pakiko su fundashon NKBB no ta kontemplá pa bira un movementu polítiko. “Último sesenta aña polítika na Antia a kousa hopi partishon.”

Statüt 1954
Finies ta ilustrá su ideanan ku e ehèmpel di Partido Nashonal di Pueblo (PNP) na Kòrsou di Moises Da Costa Gomes. E fundado di PNP aki a duna un kontribushon importante na Statüt di 1954, ku a realisá outonomia pa Antia Hulandes.

Esaki no a bai fásil segun Finies: “Partidonan ku tabata ménos interesá den outonomia e tempu ei a forma un koalishon, pa asina tene e frakshonnan pro outonomia afó i stroba e proseso di outonomia.” E kabes di NKKB ta haña esaki ta meskos ku den polítika aktual di Boneiru.

Referèndem 2015
Finies i su partidarionan tres aña pasá a protestá 222 dia tras di otro dilanti Kolegio Ehekutivo di Boneiru, pa laga polítika organisá un referèndem tokante futuro di Boneiru. Esaki a bini dia 18 di desember 2015. “Na un dado momentu e partidonan no tabata uní tokante un referèndem. Esaki a pone mi pensa i p’esei konsientemente mi a skohe pa lanta un fundashon.”

Un mayoria grandi (65 porshento) a vota nò den e referèndem. Esei a enserá ku e votadónan no tabata kontentu ku e laso aktual ku Hulanda i ku mester a negoshá esaki di nobo ku Den Haag.