Foto: Ariën Rasmijn
ORANJESTAD — Cada aña, participantenan den carnaval di Aruba ta haci gastonan extra pa por luci den e paradanan grandi. E di 60 aniversario di carnaval, cu a culmina e weekend cu a pasa den e dos paradanan grandi na San Nicolas y Oranjestad, no tabata un excepcion.
Tin un grupo basta grandi di participante fiel cu cada aña ta inverti miles di florin pa no solamente participa, pero tambe briya extra den e paradanan, biestiendo asina yama bodypiece y trahando carosa. Hendenan aki ta yama nan mes carnavalista y hopi lo bisa cu ta nan ta esnan cu ta duna carnaval di Aruba su reputacion di ta bunita y luhoso.
Tin di nan cu suficiente entrada pa por participa cu un body- of roadpiece extravagante, pero tin di nan tambe cu entrada humilde pero mas ainda asina hopi amor pa carnaval cu nan ta sacrifica financieramente, traha cu otro y te hasta hinca nan mes den debe pa por luci ariba caminda. Tin cu ta participa pa e musica y e ambiente, otronan pa e aplauso cu nan ta haya di publico. “Loke carnaval na Aruba ta trece cune ta un cierto libertad cu ainda nos tin. Cu nos por gosa ariba caminda sin cu tin hopi equipo di siguridad of trafico”, asina carnavalista Gianna Quant ta conta.
Mescos cu tur aña su participacion a coste alrededor di 4000 florin. “E ta un sam cu bo ta hunga cu bo mes. Cada luna mi ta pone un placa un banda pa mi por participa.” Carnavalista Ben Ras su trahe a costa un total di 2700 florin. “Mi ta enjoy e. Ta un bes pa aña e ta.”
Foto: Ariën Rasmijn
Pluma di avestruz
Pa hopi aña Rodney Kamperveen tabata sacrifica hopi cos pa por participa na grandi den carnaval, poniendo placa un banda cada luna pa asina por luci durante e paradanan. Otronan ta keda sin bay cu vakantie of te hasta sin sali den weekend. Asina bo ta haya tin biaha un persona cu durante henter aña ta traha como postbode, cu un tremendo bodypiece den carnaval. “Un bon trahe ta salibo awendia 3000 florin trankil. Corda bon por ehempel un pluma di avestruz ta costa 15 florin. 100 pluma ta bay den un bodypiece. Anto nainda bo tin cu paga pa otro cos, entre otro pa e costurera cu ta costa bo 200 florin”, segun Kamperveen.
Aworaki ainda e ta lider di Royal Carnival Group. “Pero ultimo añanan mi a baha man. Na final di dia bo ta hinca hopi placa den cos aki, pero kico bo ta saca afo, otro cu aplauso di e publico. Di Stichting Arubaanse Carnaval bo ta haya un plakaat, nada mas. Abo ta keda cu e gasto. Aworaki mi kier biba un bida tambe. Mi kier sali y haci otro cos.”
Foto: Ariën Rasmijn
Gastonan halto
Un trahe of bodypiece por costa un bon cen, pero e sumanan serio ta bay na e carosanan, e asina yama roadpieces. E aña aki durante e paradanan grandi y tambe di mucha, gruponan manera Majestic y TOB a impacta cu diferente carosa grandi y extremadamente luhoso. Pa construi un roadpiece, gastonan entre 30.000 y 40.000 ta masha comun. “Hopi biaha bo ta haya un paar di participante cu ta comparti e gastonan”, asina Lienchi Merryweather, lider di grupo Champagne ta splica. “Si bo tin un grupo di cuater, cada un ta compromete su mes na 10.000 florin.
Con bo ta yega na e suma ta na abo. Si bo no yega na e suma cu bo tin cu contribui, bo tin cu busca un manera. Tin hende cu ta fia placa na banco of un otro instancia.” Swinda Ras, lider di Majestic ta bisa cu e aña aki a traha cu un sistema di Sam pa hende por financia nan trahe poco poco. Anteriormentge tabata te hasta fia placa, pero a stop cu esaki. “E aña aki ainda nos tabata cobrando hende pa aña pasa”, segun Ras. Antes, comercio tabata yuda carnavalistanan como patrocinador di body- y roadpiece. “Pero esaki nan no ta haci mas” segun Robert ‘Boedoem’ Brown, tambe di grupo Majestic. “E ora abo como carnavalista tin cu percura pa bo logra haya placa, sea dor di spaar, bende rifa, barbecue, of loke sea.”
Autor: Ariën Rasmijn