Yolanda Dongen ta biba den Wishi bou di e huma di Isla – Potrét: Dick Drayer
WILLEMSTAD – E habitantenan di Wishi i Marchena ta man na kabes. Añanan largu nan tin di haber ku sekreshon di Isla. Anto awor nan bario ta deskolorá bèrdè. Metalnan pisá, ku ta kousa kánser, ta laga un depósito di koló riba tur loke ta riba kaya.
Señora Yolanda Dongen ta biba den Wishi, na númber 338A. E ta di edat avansá i henter su bida el a biba bou di e huma di Isla.
Dick Drayer a traha e reportahe akí den Wishi
“Henter mi famia ta kana ta tosa. Asma. Pero ora mi yu bai Hulanda, tur malestar ta pasa i e ta hala rosea líbramente. Lastu ei, ku mi tabata na Hulanda, dòkter a bisami ku mi mester stòp di huma. Pero mi n’ ta huma!”
Di frustrashon señora Dongen a skirbi un karta. Pa ken ku ke les’é. Den e karta e ta pidi pa yudansa. Yudansa pa, maske ta durante e delaster dianan di su bida, e por inhalá aire limpi.
Sisi Dulfer, ku ta biba un tiki mas ariba, si no tin e pasenshi ei. “Ta kon por ta, ku un médiko ku a hura pa lucha pa kada bida, ta laga nos na kaya asina?” E ta papiando di minister di Salubridat Ben Whiteman, ku tabata dòkter di kas den su bario. “Ku tur rèspèt pa un mandatario, pero Whiteman: bo ta laga nos kai manera patia bèrdè.
Outor: Dick Drayer