Promé minister Ben Whiteman awe a entregá retiru di gobièrnu serka gobernador – potrèt: Dick Drayer

Promé minister Ben Whiteman awe a entregá retiru di gobièrnu serka gobernador – potrèt: Dick Drayer

WILLEMSTAD – E atentonan pa yega na un mayoria den parlamento despues di un wikènt di deliberashon a faya tòg. “Nos ta bai prepará pa elekshon”, lider di frakshon Melvin Cijntje di partido di koalishon Pueblo Soberano ta bisa.

E no tin ‘hard feelings’ pa Marilyn Moses, e miembro di Staten ku a sali for di e partido di koalishon PAIS i a bai ku su asiento. Partido di oposishon PAR tabata dispuesto di negoshá, pero sin resultado. Cijntje: “Nan tabatin asina un lista di deseo i kada ora tabata manera tabata bini algu nobo aserka. Esei a hasi e proseso mas difísil. Awe tardi nos a disidí di instruí e ministernan pa entregá nan retiro.”

Marvelyne Wiels
Parse e opstákulo ta e empeño di minister plenipotensiario. PS no ke pa Marbelyne Wiels sali for di Kas di Kòrsou, pero tabatin mas kos, Stephen Walroud ta bisa na nòmber di PAR. “Nan tabatin problema pa pone tur palabrashon riba papel i firma nan. Pesei nos no ker a sigui papia.”

Gerrit Schotte, lider di e partido di oposishon di mas grandi MFK, último dianan tabata asombrá tokante e manera ku kosnan tabata bai. “Dia ku riba 3 di ougùstùs 2012 Dean Rozier a bai ku su asiento di MFK nos a entregá nos retiro mésora. E gobièrnu aki a haña mas tempu serka gobernador, aparentemente ta skibi demokrasia di nobo dependiente di kua partidonan tin aden.”

MFK a indiká ku nan ta kla pa elekshon. Djamars atardi kuartu pa dos gobernador ta warda Gerrit Schotte pa un ronda di konsultashon. Esaki lo sosodé ku kada partido, asina gabinete di gobernador a laga sa.

Lider di partido
Pueblo Soberano, ganadó grandi di e elekshonnan anterior, lo mester hasi lihé.Despues di e asesinato riba lider di partido Helmin Wiels, un kambio den maneho i despedida di algun minister i un promé minister, e partido a haña hopi sla. “Na desèmber nos ta skohe un lider nobo. Ami ta keda den polítika si, pero mi no ta bira lider, esei mi salú no ta pèrmití.”, asina Cijntje, ku ta rekuperando di kebrante di salú, ta bisa.

Outor Anneke Polak