Anthony Eustatius – Potrèt: Deya Mensche
WILLEMSTAD – Tur 17 di Ougùstùs, Asosiashon Promoshon Konsenshi Históriko ta organisá e konmemorashon di e rebelion di Tula, unda ta para ketu na e evento históriko akí. E aña akí organisadó nan di referendum NO a probechá di e fecha históriko i a organisá un protesta kontra di e leinan di konsenso, kual a kaba na altura di Rif. Organisadó nan ta estima ku aproksimadamente 1500 persona a asistí e protesta.
E konmemorashon di Tula, akompañá pa deklamashon, splikashon históriko, músika i baile, tambe tabata bon bishitá. Ret Karibense a kòmbersá ku Frank Quirindongo, presidente di e asosiashon organisadó, i tambe abogado Anthony Eustatius, kende a asistí e marcha.
Frank Quirindongo a enfatisá ku nan no a uni forsa ku e organisashon di NO pa organisá e evento nan, pero si tabata na altura di nan marcha. “Mi ta sostené nan derechi di protesta, pero nos ta dos aktividat separa”, Quirindongo a deklará. Según Eustatius, aproksimadamente mil pa 1500 persona a asistí e protesta kontra e leinan di konsenso.
Frank Quirindongo – Potrèt: Deya Mensche
“E meta di e marcha ta pa kolekshoná sufisiente firma pa demostrá pueblo su malkontentu ku e referendum na 2009”, e konosido abogado a splika. Eustatius ta di opinion ku e referendum tabata kontaminá i ku a usa fondo di banko sentral pa influensia e resultado. Eustatius a splika ku nan ta demostrando pa bini un referendum nobo i bari e leinan di konsenso fo’i mesa. Noraima Zimmerman, un di e demostrante, a asistí e protesta ku su dos yunan, pa asina siña nan para pa nan derecho. “Mi ta kontra ku Hulanda ke tuma over i p’esei m’a manifestá”, Zimmerman a splika.
Konmemorashon TULA
E aña akí, e konmemorashon di e rebelion di Tula tabatin un toke mas moderno, ku músika i baile mas kontemporáneo, kual a asombra algun puritano ku ta preferá un konmemorashon mas tradishonal. Según Quirindongo, su tim a traha masha duru pa realisá e evento akí ku e rekurso nan limita, i ta inmensamente satisfecho ku e resultado. “Banda di músika i ekspreshon kultura, nos a enfoká riba duna informashon na e pueblo di e lucha i rol di Tula pa nos komunidat”, ela splika. Huntu ku un plataforma kultural, APKH tambe a organisá Ruta Tula, kual a proba di ta un eksitoso rotundo, i ya e dos fecha nan ta kompletamente bendí.
Durante di e aña, e asosiashon lo organisá varios aktividat, manera charla na skol, traha video informativo, skirbi buki i a hasí diferente kos pa lanta e konsenshi históriko di nos komunidat”, ela splika. Dia 23 di Ougùstùs próksimo, UNESCO ta konmemorá abolishon di sklabitut mundial, i e asosiashon lo organisá un charla ku un profesor di historia di Universidat di West Indies na NAAM. Tambe di 3 di Òktober, dia Tula i su kompatriota nan a keda ehekutá, e asosiashon lo para ketu na esaki.
Studiante pa doctor di filosofía den antropologia na Merka, Keisha Wiel, ta di vakashon ku su amiga Dana Muñiz, i a tende di e konmemorashon na radio. “Ta importante pa pueblo siña mas di su historia, pues mi ta kontentu pa presensia esaki”, Wiel a kompartí. “Mi ta originalmente di Puerto Rico i mi ta asombra pa mira un aktividat kultural ku ta konmemorá un rebelion di katibu. Na mi pais no tin kasi nada asina, i apesar di e barera di idioma, mi a siña hopi di e historia di Kòrsou”, Muñiz a deklará.
Outor Deya Mensche