Rei Willem-Alexander ta lesa e Diskurso di Rei riba dia di apertura di aña parlamentario – potrèt: ANP Royal Images/ Sander Koning
DEN HAAG – Rei Willem-Alexander a pone poko atenshon na e parti karibense di Reino ora el a pronunsiá e Diskurso di Rei riba dia di apertura di aña parlamentario, kaminda e ta elaborá riba e plannan di gabinete pa e aña ku ta bini.
E kabes di estado un ratu a menshoná e koperashon hulandes ku e partinan karibense di Reino pa e membresia temporario di Konseho di Seguridat di Nashonnan Uní. Tabata e promé i último bia ku e palabranan ‘karibense’ i ‘Reino’ a kai.
Un tema importante di e Diskurso di Rei riba dia di apertura di aña parlamentario tabata terorismo internashonal. Pero e parti di mas grandi tabata trata di e ekonomia hulandes ku ta drechando.. Kasi tur hulandes lo bai dilanti den nan forsa di kompra.
Ministerionan
Ministerionan tambe lo haña mas plaka. E bùdjèt pa Relashonnan den Reino (parti di ministerio di Asuntunan Interior i Relashonnan den Reino, BZK) ta subi di 258 pa 293 mion euro. E fondo di BES ta keda igual riba 33 mion euro.
Defensa ta bai dilanti despues di un trènt di añanan largu pa ekonomisá. E bùdjèt di wardakosta karibense (BZK) ta subi di 37.8 pa 39.6 mion. Ku esaki a sera un buraku den presupuesto kousá pa diferenshanan entre euro i dòler, loke poko tempu pasa tabata un tópiko di diskushon den Tweede Kamer.
Paisnan
Hulanda ta saka 70.1 mion euro na e funshon di garantia den e Paisnan di Reino. Ku esaki mester garantisá siguridat di derechi, kalidat di gobernashon i derecho humano na Aruba, Kòrsou i Sint Maarten. Esaki ta kai bou di responsabilidat di Reino.
Hulanda na 2017 ta paga kasi 150 mion na sanashon di debe di Kòrsou i Sint Maarten. Ta te na 2019 e suma aki ta baha.
Hulanda Karibense
Hulanda ta kontribuí 14.7 mion euro na proyektonan sosial ekonómiko na Hulanda Karibense. Mas o ménos mitar di nan ta hurídikamente obligatorio. Un punto importante ta derecho di mucha, ku tin 3 mion euro disponibel p’e na 2017.
Ministerio di Asuntunan Sosial i Bienestar (SZW) tambe ta pone 100 mion euro disponibel pa mucha ku ta lanta den pobresa, spesífikamente 1 mion pa mucha na Hulanda Karibense. SZW ta parti un total di 85 mion euro via munisipionan i 14 mion via organisashonnan sosial ku fókùs riba kombatimentu di pobresa serka mucha.
Outor Pieter Hofmann