René Vincente Rosalia, lider polítiko di Movementu Kousa Promé | Potrèt: Dick Drayer
WILLEMSTAD – Movementu Kousa Promé (MKP) ta un partido ku ta lucha pa emansipashon. “Nos ta bai desaroyá un Yu di Kòrsou nobo, i kuné nos ta bai trata e problemanan di Kòrsou. Problema number 1 ta korupshon”, Rene Rosalia, lider di partido di Kousa Promé ta bisa.
Elekshonnan 2016, Ret Karibense ta presentá e partidonan: Parti 12 Movementu Kousa Promé
E Yu di Kòrsou nobo ta konsiente di su identidat i liberá di sklabitut mental. Segun Rosalia e ta kapas di koperá na un Kòrsou próspero. Un Kòrsou independiente i ku ta disidí su mes kaminda.
Dick Drayer ta papia ku René Rosalia
“Nos ta sigui un ideologia humanista: stima bo próhimo manera bo mes. For di perspektiva humanista. E konsientisashon di e pueblo ta importante pa kria e Yu di Kòrsou nobo.”
Konsientisashon
Rosalia ta atmití ku ta posibel ku e kaminda ta largu i yen di opstákulo. “Korupshon a pone nos atras enormemente. Otro áreanan di interes, manera enseñansa, mester krea kondishonnan pa para esaki.”
Konsientisashon den e área di salubridat públiko tambe ta un punto klave di MKP. Den e área ei e partido ta konsentrá espesialmente riba prevenshon. “Kòrsou mester bai hasi deporte. Nos ta den tòp 5 mundial si ta trata di adikshon na hungamentu di plaka i di diálisis di nir. Nos ta muchu gordo, ku tur konsekuensha di esaki.”
Medionan di komunikashon
Pa MKP ta importante pa medionan di komunikashon tambe tuma nan responsabilidat. “Sin sensura, esei nos no ke. Pensa mas lihé riba regulashon. Nos ta para pa un emisora públiko, radio, televishon i korant, ku ta manifestá nan mes den e área di edukashon i konsientisashon.”
Segun e programa di elekshon di MPK, sentronan di bario mester haña mas ekipahe. Profeshonalnan mester sostené e sentronan aki uniformemente riba e tereno di desaroyo di komunidat, aktividatnan, kultura, deporte i rekreashon.
Outor Dick Drayer