Tin hopi nesesidat di kuido vaskular i di herida
WILLEMSTAD – Elba Valks-Henriquez tabata seka di pèrdè su pia. “E speshalista médiko a hasi e diagnósis mientras ku sin interes e tabata papia na telefon anto pa kolmo tabata wak e otro pia ku no tabata malu. “El a hasi un diagnósis robes”, Valks-Henriquez ta konta.
El a kore sali e ofisina di dòkter i al fin al kabo pa trato di su sirkulashon i adernan el a bin resultá seka siruhano vaskular Randolph van Eps. Van Eps, for di 2010 despues ku enbano el a ofresé su servisionan na Hòspital Sint Elisabeth, ta traha na Hulanda atrobe. Tur aña e ta bini Kòrsou un tempu kòrtiku i e ta mira mas tantu pashènt posibel, ku eventualmente e por sigui trata na Hulanda.
Diagnósis robes
Al fin al kabo Valks-Henriquez a bai Hulanda. Van Eps a logra skapa su pia. “Mi a pèrdè tur konfiansa den kuido médiko na Kòrsou”, Valks-Henriquez ta bisa. “Si mi no a sali na mi mes defensa, lo mi tabata falta un pia awor.”
Van Eps ker a bai su isla natal bèk ku e konvikshon ku Kòrsou mester di un siruhano vaskular ku dedikashon. Asta na e hòspital kaminda e tabata traha na Rotterdam e departamento di dialisá tabata yen di pashènt di diálisis di Kòrsou. Banda di esaki e tabatin diferente pashènt ku problema di sirkulashon ku a haña un tratamentu di pone bypass seka dje.
Pa por traha na un manera efektivo i efisiente na Kòrsou e ker a traha den Sint Elisabeth Hospitaal tambe. Pasobra no tin siruhano vaskular na Kòrsou el a asumí ku lo no ta un problema pa drenta. Pero esaki a resultá nèt kontrali.
Komishon di atmishon
Van Eps ta bisa ku tres aña pasa for di prinsipio e siruhanonan di hòspital tabata kontra dje. “E organisashon profeshonal di siruhano ku alabes ta forma e komishon di atmishon tabata blòkia mi” Su kasá, Susanne van Eps-Habibe, simpelmente ta bisa: “Spesialista médiko a haña 20 te 30 aña di tempu pa forma un kartel ku kasi no por kibra.”
E komishon a haña ku no tin mester di un siruhano vaskular. “Reku tur sinku siruhano di SEHOS tabata hasi operashon vaskular kaba. No tabata papia di e kalidat di sirugia vaskular ni di e eksigensianan ku bo mester kumpli kuné pa bo por praktiká sirugia vaskular komo siruhano. Un detaye interesante ta ku e presidente di e komishon di atmishon tabata kompartí un poli eksterno ku un di e siruhanonan”, Van Eps ta bisa.
Amputashon
“Den e tempu kòrtiku ku m’a traha na Kòrsou mi a eksperensiá si kuantu nesesidat tin di kuido vaskular i di herida.” Esaki Van Eps ta bisa ku doló den su kurason ora e mira bèk riba e tempu kòrtiku ku el a traha na Kòrsou. “Loke ta molestiá mi mas ku tur kos, ta ku riba e isla aki un siruhano vaskular sertifiká i ku eksperiensha por a funshoná bon. No ta trata spesífikamente di mi persona, pero tin hopi nesesidat di un siruhano vaskular asina. Tin masha hopi amputashon ta sosodé. Nos por a baha e kantidat aki.”
Konkurensha
Na Kòrsou mayoria be ta un siruhano general ta hasi operashon vaskular. “Na Hulanda masha tempu no ta permití esaki mas”, Van Eps ta bisa. E ta kere ku ta pa miedu di konkurensha e speshalistanan di SEHOS a ten’é afó. “Tabata kla basta lihé ku tur operashon di ader lo a pasa p’ami.” Su meta tabata pa huntu ku un òf dos siruhano sigui desaroyá sirugia vaskular. “Tin sufisiente trabou riba e isla i no tin motibu pa opstakulisá, djis pa motibu di envidia profeshonal.”
Van Eps-Habibe ta bisa ku ta interes finansiero ta hunga un ròl. E ta hurista i e tabata entregá e deklarashonnan di su kasá seka e kompanianan di seguro. “Pa kita un pia bo ta keda kla den mei ora. Ta deklará 700 florin p’esaki. Ku amputashon bo ta bira riku. Di otro banda pa skapa un pia ta kosta hopi mas tempu i esfuerso i bo por deklará solamente 56 florin pa siman.”
Èks inspektor di Salubridat Jan Huurman den pasado a insistí pa tin por lo ménos dos siruhano vaskular, mirando kuantu pashènt ku suku tin i e kantidat haltu di diálisis di nir. Huurman tambe a papia di un kantidat grandi inaseptabel di amputashon, esta tres i mei be mas tantu ku na Hulanda.
Outor: Leoni Leidel-Schenk