Anestesiólogo Pascal Sahoury
WILLEMSTAD – “E lugá aki ta un nèshi di maribomba”, anestesiólogo Pascal Sahoury ta bisa si bo puntr’é kon kuido médiko ta funshoná na Kòrsou. Sahoury a bini Kòrsou na 1995 i na aña 2000 el a kuminsá independientemente ku e Pain Clinic.
Na promé instansia esaki lo a haña akomodashon den Taams Kliniek pero esakinan a pas pasobra kombatimentu di doló no ta den e pakete di SVB, ta tuma hopi tempu i no ta produsí plaka.
Sahoury ta bisa ku for di prinsipio el a topa ku hopi resistensia di su koleganan. E ta haña e palabra ‘kartel’ muchu suave: “ta mafia di bachi blanku”. Sierto spesialista no ke referí pashènt òf asta ta nenga di aseptá pashènt ku ta bou di su tratamentu.
Pashènt non grata
“Niun hende aki no ke duna un tratamentu adishonal largu”, Sahoury ta kontinuá. “Hopi be ta laga pashènt di kanser pa nan kuenta. Nan ta bira ‘pashènt non grata’. Kuido terminal ta un profeshon riba su mes, ku ami a spesialisá aden. Mi no sa mashá di onkologia pero sí di kombatimentu di dolo, ta p’esei nos mester koperá. Esei no ta sosodé.” E ta bisa ku pashènt no ta wèlkòm mas seka onkólogo ora nan ta sigui tratamentu seka dje. “Mientras ku nos mester di otro. Nos ta duna servisio i traha pa e mesun meta.”
Sahoury ta haña teribel ku ta trata pashènt manera ta mucha chiki nan ta. “Nos tur ta bisa ku ta e pashènt ta pará sentral, pero den práktika ta e médiko ta para sentral. Komo médiko nos mester baha for di nos pedestal i bai para banda di e pashènt. Naturalmente e médiko ta e eksperto, ma nos no mester brua kere ku esaki ke men ku nos sa tur kos di loke ta trata e bon sintimentu individual i smak den bida di e pashènt.”
Monopolio
Èks inspektor di Salubridat Públiko, Jan Huurman, tambe a hañ’é ku e posishon di poder di e spesialistanan médiko. “E problema na Kòrsou ta ku e spesialistanan médiko tin un monopolio. Na Hulanda bo por buska un second opinion seka un otro spesialista, den un otro hòspital, den un otro siudat, aki nò.”
Ademas e èks inspektor ta kere ku un inspekshon pa tur isla ta e solushon. “Den mi opinion mester bini un inspekshon pa e islanan ABC. Un inspekshon riba kada isla ta muchu chikí. Ku un inspekshon sentralisá bo por traha mas krítiko i ophetivo.”
Supervishon
Sahoury ta haña malu ku inspekshon no tin wes’i lomba. “Aki nos tin mester di por lo ménos seis inspektor, nan lo mester komprobá e maneho. Nos aparatonan i métodonan ta bieu i añanan largu ta aseptá esaki. No ta protehá pashènt, i pashènt mes no ta sali pa nan derecho pasobra no tin un asosiashon di pashènt.”
E ta bisa ku mester analisá kuido médiko kompletamente. “13.5 porshento di nos produkto bruto nashonal ta bini di kuido médiko. Hende ta entregá 12 porshento di nan entrada bruto total na Segúro Básiko pa kuido médiko ku hopi limitashon i asta ku diferente klase”, Sahoury ta bisa. “ Kaminda un seguro na Merka ta kosta 6 mil dòler pa dos persona i bo ta haña bon kuido médiko den hòspital renombrá. Aparentemente nos ta hasi algu robes aki.”
Outor: Leoni Leidel-Schenk