Raylison Martina tabata na kaminda pa Schiphol ora su tata a fayesé na Kòrsou
WILLEMSTAD – Raylison Martina no tabata di akuerdo ku e operashon planeá pa hasi e stoma di so tata mas chikí. E tata tabatin hopi aña ta sufri di sobrepeso i tabata desisidu pa laga hasi e operashon den Sehos.
Despues di trintitres dia el a fayesé despues di komplikashonnan severo. Nèt su yu Raylison tabata na kaminda pa Schiphol pa bula bini Kòrsou.
Djis despues di morto di Julio Martina e inspektor di Salubridat Públiko di e tempu ei, Jan Huurman, a para operashon pa hasi stoma mas chikí. Famianan di Martina no a konfia e kos i a entregá un keho seka inspekshon. Un keho ku nan no a tende nada mas di dje despues ku Huurman a bai. “Ta djis un kontesta mi ke, pa nos por sigui ku nos bida”, Raylison ta suspirá.
Lèkmentu
Tata Martina dia 8 di yanüari a bin resultá riba mesa di operashon di dòkter Berry i dòkter Fa Si Oen. Despues di tres dia a lag’e sali for di hòspital. Algun siman masha doloroso tabata ward’é. Julio a bishitá dòkter Berry varios biaha ku keho di doló, pero kada be a mand’é kas bèk.
Dia 4 di febrüari e doló a bira insoportabel i a atmití Julio na hòspital, kaminda a bin sali ku tabatin lèkmentu kousá pa un asina yamá ‘poortbreuk’; zür di stoma i kuminda tabata lèk bai den su barika. Despues di dos operashon mas el a fayesé dia 10 di febrüari.
Despues di su promé operashon Julio Martina no por a hasi nada mas e mes i e tabata biba riba kuminda líkido. Ora ku a atmitié di nobo na hòspital su yu muhé a keda band’e dje dia i nochi. “E kos tabatin un impakto enorme riba nos famia. Mi tata tabatin 56 aña di edat i banda di su sobrepeso e tabata salú. Si dòkter a tuma su kehonan na serio lo e tabata na bida ainda.”
Inspekshon
Raylison ta desapuntá den e funshonamentu malu di inspekshon despues ku Huurman a bai. “Ta lástima ku ta na inspekshon so mi por bai, i mi no ta konfia nan mas.” Ku un karta urgente na minister di Salubridat Públiko Bernard Whiteman, djis promé ku Huurman a bai, el a spera di evitá ku lo lubidá riba su keho. Pasobra Huurman a traha konsepto di un rapòrt, pero no a alkansá di yega na un konklushon final. “Nos tabata horifiká ora a bira opvio ku e fayesementu di mi tata no tabata e úniko kaso”, Martina ta bisa.
Den e rapòrt ta remarkabel ku Martina su ruman muhé i e siruhano ta duna diferente vershon. E siruhano ta bisa ku e pashènt ta kome i bai af masha bon. Martina ta pretendé ku su tata por a kome solamente kuminda líkido. Den e rapòrt ta nota ku e ‘apuntashonnan klíniko di e siruhano ta asina breve ku nan no tin un nifikashon relevante pa e rapòrt’.
Karta urgente
Raylison: “Mi ta frustrá ku minister Whiteman no a tuma e karta urgente na serio, nota bon ku e mes tabata inspektor!” Martina no a enfrentá siruhano Berry personalmente ainda: “Mi a skohe pa esaki konsientemente, e kos ta muchu emoshonal.” Loke e ta preferá ta pa taha Berry pa traha komo siruhano i asina no perhudiká otro pashènt.
Segun Joe Alcalá tin masha hopi falta di supervishon den Sehos
Pregunta
Segun inspektor general suplente Joe Alcalá tin dies aña kaba ku ta hasi operashon pa hasi stoma chikí na Kòrsou. Poko tempu pasá pa di tres be kaba a prolongá e paro riba e tipo di operashonnan aki. “Tin hopi pregunta si ta ehekutá e operashonnan aki segun reglanan internashonal. Pa hasi esaki bo mester di un bon registrashon. Ta konosí ku tin komplikashon i ku pashènt sa fayesé.” Segun Alcalá un siruhano mes ta introdusí un operashon nobo den hòspital. “Ta nan mes ta responsabel p’esaki i hospital t’ei pa supervisá si esaki ta sosodé na un manera korekto.”
Supervishon
Alcalá no por bisa nada tokante di e keho di Martina. E no sa si a manda e keho kolegio disiplinario médiko kaba, pero si tabata asina mester a informá e famia. Alcala ta atmití ku tin keho na inspekshon ku ta mas bieu ku un aña. “Nos tin hopi aña kaba ku nos no tin sufisiente personal. Aktualmente inspekshon ta buskando un inspektor di Salubridat Públiko i un inspektor athunto.” Esaki lo tuma seis pa ocho siman mas. Alcalá ta preferá di por duna tur su atenshon na supervishon. “Inspekshon no t’ei solamente pa trata keho pero tambe pa supervisá i hasi investigashon. Último añanan tin un skarsedat grandi di e aktividatnan aki.”
Outor: Leoni Leidel-Schenk